Një fushatë ndërgjegjësuese për banorët e nisur nga Bashkiar e Tiranës që të mbajnë pastër qytetin është mirëpritur nga qytetarët, por syrit nuk i ka shpëtuar gabimi gjuhësor në formulimin e sloganit.
“Pastrimi dhe mbajtja pastër e qytetit fillon nga ty!”- shkruhet në posterin e bashkisë, por si rregull gjuhësor duhet të jetë forma “ti” dhe jo “ty”.
Gabimin e kanë konstatuar dhe më pas shpërndarë me sqarimin korrekt faqja e facebbok-ut, “Këshilluesi gjuhësor”, një faqe e menaxhuar nga njohës të mirë të shqipes, ku shpesh kritikohen kompanitë për përdorimin e një gjuhe jo korrekte nga ana gjuhësore në formulimin e sloganeve të tyre të marketingut.
Gabime gjuhësore shohim kudo, në menutë e restorantëve, në tabelat e bizneseve, madje dhe në media, e cila do të duhej të ishte promotorja e një gjuhe të pastër, por këto gabime i bëjnë edhe zyrat shtetërore.
Sqarimi gjuhësor:
“Nga ti e jo nga ty
Po shkruaj përsëri për reklamat e vendosura në tabelat e stacioneve të autobusëve. Më e fundit ishte shkruar kështu: “Pastrimi dhe mbajtja pastër e qytetit fillon nga ty!” Gabimi drejtshkrimor qëndron te pjesa “fillon nga ty” e më konkretisht te “nga ty”, që duhet shkruar “nga ti”. Po pse duhet shkruar “nga ti”? Pas parafjalëve nga e te (tek) përemri, ashtu si emri, vihet kurdoherë në rasën emërore. Për shembull, e mori nga ti (nga kush?), po vij te ti (te kush?).
Vihet re herë-herë se pas këtyre parafjalëve, në vend të trajtës ti, përdoret gabimisht ty. Për shembull: Do të vijmë te ty. Nuk do të largohem nga ty. Nesër do të mblidhemi te ty. Te të gjithë shembujt e mësipërm duhet përdorur: te ti, nga ti. Pra, asnjëherë nuk duhet përdorur: te ty, nga ty, por duhet përdorur gjithnjë: te ti, nga ti.
Shënim: Trajta “tek” përdoret zakonisht përpara emrave e përemrave që fillojnë me zanore. Për shembull: Ja tek është! Ja tek e ke! Shkoi tek i ati (tek e ëma, tek i biri). Tek ana e lumit (e rrugës), tek unë, tek ai etj.
Përfundimisht, duhet shkruar kështu: Pastrimi dhe mbajtja pastër e qytetit nuk fillon nga ty, por fillon nga ti.” /tesheshi.com/
