Që nga konceptimi, Iftari i Hapur ka mikpritur 50 mijë miq në shtatë universitete në katër kontinente.
Ndodhur në zemrën akademike e kulturore të kryeqytetit britanik, kopshtet e rrugës Malet janë ikonë për bulevardin e tyre plot pemë. Përgjatë katër vjetëve të fundit, sidoqoftë, vendndodhja e Bloomsbury-it në Londër ka fituar një famë të re.
Ajo është bërë strehë e projektit të tendës së Ramazanit – Iftari i Hapur- një ndërmarrje sociale ku deri në 300 njerëz thyejnë agjërimin së bashku gjatë muajit të shenjtë të Ramazanit kur muslimanët agjërojnë nga agimi në perëndim.
Në orën 8 pasdite, dyert prej hekuri të rrahur jashtë kopshtit hapen, duke lejuar londinezët e uritur të gjejnë rrugën drejt një tende të madhe. Si një fanar urban, hapësira e zgjatuar shkëlqen nën rrezet e fundit të ditës, ndërsa një çati transparente lejon gjelbërimin e gjetheve të pemëve të shihet sipër.
Në tendë, vizitorët përshëndeten nga vullnetarët të cilët u japin atyre çanta plastike blu për të vendosur këpucët, kështu që mund të ecin zbathur brenda tendës – ashtu si në çdo xhami.
Themeluar në vitin 2011 nga Omar Salha, në atë kohë student në shkollën e Studimeve Orientale dhe Afrikane, Iftari i Hapur nisi si një nismë komunitare për studentët ndërkombëtarë të cilëve iu mungonte mjedisi familjar dhe komunitar që mund të kishin pasur në shtëpitë e tyre.
“Ideja ishte të mundësohej një ndjesi shtëpie-larg-shtëpisë. Ne kishim rreth 15 njerëz që morën pjesë në Iftarin e parë të Hapur, në një copëz vendi me bar në terrenin e shkollës”, thotë Salha.
Që prej asaj kohe, Iftari i Hapur ka lulëzuar në një projekt të madh që është i hapur për çdokënd.
“Ngadalë nisi të rritej e të përfshinte njerëz nga të gjitha origjinat, njerëz të pastrehë, kalimtarë, profesionistë, njerëz të besimeve të tjera dhe etnive të tjera. Është përulëse të shohësh pas e të mendosh sesi e nisëm”, thotë Salha.
Frymëzuar nga tradita e tendave të ngritura në qytetin turk të Stambollit gjatë Ramazanit, Salha thotë se mungesa e dukshme e karrikeve në tendë është kujtesë përulësie.
“Na kujton të jemi modestë, në kuptimin që ne të gjithë jemi të ulur në tokë. Kushdo që të jesh, investitor bankash apo punëtor, këtu ne vijmë të gjithë bashkë dhe trajtohemi baraz”, thotë ai.
Që prej themelimit, Iftari i Hapur ka mikpritur 50 mijë persona në shtatë universitete në katër kontinente, që nga Zambia e deri në Shtetet e Bashkuara. Këtë vit, Iftari i Hapur nisi turin e parë britanik në Bradford, Birmingham dhe Mançester.
Salha thotë se qëlimi më i rëndësishëm i Iftarit të Hapur ishte të krijonte një hapësirë të sigurtë për muslimanët britanikë që të njihen e bashkëveprojnë me njëri-tjetrin por edhe me ata që nuk janë familjarë me Islamin mes një klime në rritje anti-muslimane në Britani.
“Shpesh, pothuajse, muslimanët përfliten por nuk iu flitet. Iftari i Hapur është një mundësi e mirë për të ri-kornizuar mënyrën sesi portretizohen muslimanët në media dhe të angazhohen përmes bashkëveprimeve sociale si ky. Kjo është një nismë diplomatike, diplomacia e ushqimit, e besimit dhe dukshëm e njëri-tjetrit për shkak se ne kemi këtu njerëz që kanë ardhur nga kaq shumë vende të ndryshme”, thotë ai.
Vullnetarë të përkushtuar
Pjesë integrale e aktiviteteve të Iftarit të Hapur janë një grup vullnetarësh të përkushtuar, shumë prej të cilëve janë studentë.
“Më duhet të dorëzoj tezën time për katër muaj, kështu që jam nën presion të madh”, thotë një studente doktorature, Rafeah, e cila ka qenë vullnetare për tre vjet.
“Por, kur vij këtu, pavarësisht ditës që kam pasur, harroj çdo gjë për pak orë, sesa i stresuar kam qenë”, shton ajo.
Për Rafeah, prania në një Iftar të hapur është një mënyrë gjeniale për të nisur bisedime midis të huajsh që rezultojnë në diskutime ndër-fetare dhe përvoja të papërsëritshme nxënieje përmes së cilave mund të farkëtohen miqësi dhe mirëkuptim.
“Kur erdha së pari këtu si e ftuar katër vjet më parë, nuk njihja askënd, kështu se thjesht nisa të flas me njerëzit që ishin ulur pranë meje për punën, për agjërimin. Kishte edhe jo-muslimanë, kështu që ata nisën të më bëjnë pyetje për agjërimin dhe faljen po ashtu, pasi në fakt, është një mënyrë e mirë për njerëzit të nisin të mësojnë për Islamin, pasi ata mund të mos e dinë përse muslimanët agjërojnë, përse falemi pesë herë në ditë dhe përse nuk mund të pimë ujë”, shton ajo.
“Mëson për Judaizmin dhe Krishtërimin po ashtu, sepse ka njerëz prej këtyre besimeve dhe po ashtu ata na mundësojnë një vështrim në brendësi të fesë së tyre. Mund të shohësh krahasime dhe ngjashmëri midis tre feve, që është e mirë pasi e edukon veten duke ardhur këtu”, shton ajo.
“Bisedat”
Që prej vitit 2017, Iftari i Hapur ka qenë pritës i një numri folësish të cilët kanë përcjellë një seri bisedash të stilit TEDx, të quajtura “Bisedat RTP”.
Këtë vit, një prej këtyre folësve ishte edhe prezantuesi i lajmeve në Channel 4, Jon Snoë si dhe kryebashkiaku i Londrës, Sadiq Khan.
Duke folur përpara audiencës më të madhe që kishte parë ndonjëherë tenda, Khan tha: “Kur sheh rreth e rrotull kësaj tende, sheh njerëz të origjinave të ndryshme, besimeve të ndryshme, moshave dhe entive të ndryshme, nga pjesë të ndryshme të vendit, të botës, burra dhe gra që qëndrojnë së bashku për të bërë gjënë më të thjeshtë: thyerjen e bukës, por ata bashkohen me ata që janë muslimanë në muajin më të shenjtë të muajve gjatë kohës së shenjtë të muajit të Ramazanit”.
Përgatiti: Juli Prifti – /tesheshi.com/
