Këshilli i Lartë i Drejtësisë ka njoftuar me anë të një komunikate për shtyp se ka nisur hetimet ndaj gjyqtarëve që kanë dhënë pafajësinë për anëtarët e “Hakmarrjes për Drejtësi”.
Në njoftimin e shpërndarë bëhet e ditur se “Hetimi është nisur me kërkesë të presidentit të Republikës, Bujar Nishani, pas shpalljes së pafajshme të organizatës ‘Hakmarrja për Drejtësi’, e konsideruar përgjegjëse për akte të rënda kriminale. Gjyqtarët subjekt të këtij hetimi janë Alaudin Malaj, Artur Kalaja, Stavri Kallco, Sotiraq Lubonja dhe Etleva Temo. Konkretisht, KLD do të verifikojë veprimtarinë e gjyqtarëve, që dyshohen për akte dhe sjellje që kanë çuar në vendime të paligjshme”.
Por këtij lajmi duhet t’i shtohet një sqarim që KLD si institucion është i perënduar me ngritjen e organeve të reja të qeverisjes së drejtësisë pas miratimit të reformës. Ndërkaq, të gjithë gjyqtarët e sipërpërmendur janë promovuar nga kjo KLD dhe në veçanti nga Presidenti Nishani. Në veçanti Alaudin Malaj, mbi të cilin ka nisur një hetim nga ILDKP-ja për fshehje pasurie por që u mbrojt nga KLD.
Për ta shpjeguar më qartë, “hetimi” është me fjalë pasi KLD nuk ka as nene as kohë për ta bërë këtë akt procedurial.
Nëse do të donte, vetë Presidenti apo anëtarët e KLD mjafton të firmosnin një padi në Prokurorinë e Tiranës apo Krimeve të Rënda, institucione që nuk janë suspenduar nga Kushtetuta e Re. /tesheshi.com/
