Presidenti i Republikës Bujar Nishani, i bën përsëri “gol” mazhorancës duke mos dekretuar të dytin ligj të rëndësishëm radhazi brenda javës dhe detyron qeverinë t’i nisë gjërat nga fillimi në sezonin Parlamentar të shtatorit.
Me anë të një dekreti të sapo bërë publik zyrtarisht në faqen e Presidencës, kreu i shtetit i thotë “JO” ligjit për Arsimin e Lartë, një nga më të rëndësishmit që janë miratuar nga mazhoranca, që e cilëson në shtratin e reformave bazike të ndërmarrë në vend.
Në shkresën e tij drejtuar Kuvendit, Bujar Nishani, rendit pesë arsye që ligji i Arsimit të Lartë duhet riparë me kujdes dhe që sipas Presidentit të Republikës ka shkelje të rënda kushtetuese.
Pesë arsyet
- “Në këtë proces Institucionet e Arsimit të Lartë dhe studentët kanë një rol vital, gjë e cila do të duhej të shmangte çdo qasje etatiste që rezulton të jetë e mëshiruar në ligjin më të fundit të Arsimit të Lartë në R.SH”.
- “Përmes këtij ligji rrezikon të kushtëzohet e drejta për arsimin e lartë nga kriteri i pagesës së tarifave të ndryshme të përcaktuara në ligj, por që mund të arrijnë në shifra të larta të papërballueshme për nivelin mesatar të jetesës në Shqipëri”.
- Ky Ligj nuk garanton Autonominë e Institucioneve të Arsimit të Lartë dhe Lirinë Akademike të parashikuar nga Kushtetuta në nenin 57/t të Saj”.
- “Autonomia e IAL në kuptim të Jurisprudencës së Gjykatës Kushtetuese vendim nr. 9/2008 cenohet për sa kohë krijohen apo ristrukturohen Agjenci të ashtuquajtura Autonome, të cilat janë në varësi të plotë të Ministrisë Përgjegjëse për Arsimin dhe pretendohet të realizojnë synimet e kësaj Reforme në drejtim të cilësisë, konkurrueshmërisë dhe garantimit të mundësive të barabarta mbi bazën e meritës dhe transparencës për të gjithë individët që dëshirojnë të ndjekin studimet e larta”.
- “Autonomia e Universiteteve duket e cenuar edhe nga ndikimi i ekzekutivit në përbërjen e Bordit të Administrimit”.
/tesheshi.com/
