Presidenti i Republikës, Bujar Nishani, ka paralajmëruar mazhorancën se nuk do ta firmosë dhe do ta rikthejë sërish në Kuvend reformën në drejtësi nëse nuk miratohet pa një koordinim me të gjithë institucionet.
Duke folur në një intervistë për Klan, Nishani theksoi se kthimi i ligjit të turizmit dhe i atij të arsimit të lartë nuk është bërë për çështje politike por ligjore dhe për të respektuar standardet.
Pasi akuzoi mazhorancën se ka shkelur standardet, kreu i shtetut theksoi se edhe për reformën në drejtësi po mbahen qëndrime militante. Për këtë ligj, Nishani ka një qëndrim të qartë: “Do të respektoj hapësirën dhe të drejtën time kushtetuese, në qoftë të se do të jetë në përputhje me Kushtetutën e Republikës së Shqipërisë, e cila reflekton standardet qoftë të së drejtës, qoftë balancimit të pushteteve, qoftë të kontrollit dhe shtetit, le të themi, të distancuar nga institucionet, të distancuar nga ndërhyrja politike, pa dyshim që unë do ta mbështes dhe do ta dekretoj. Në rast se do të ketë konstatime që pjesë të këtij legjislacioni do të bien ndesh me Kushtetutën, do të mbaj të njëjtin qëndrim që kam mbajtur deri më sot në sjelljen time institucionale”. /tesheshi.com/
