Në prag të zgjedhjeve lokale të 21 qershorit, Presidenti Bujar Nishani u ka përcjellë qytetarëve një mesazh për rëndësinë e votës duke bërë apel për të mos bërë pazare me votë, por për ta ushtruar këtë të drejtë në favor të qytetarëve dhe shoqërisë.
Sipas Kreut të Shtetit, me anë të votës qytetarët do të zgjedhin ekipet që do të qeverisin në nivel vendor.
“Votimi përbën një akt sublim për qytetarët, si dhe është shprehje e vullnetit të lirë në demokraci. Me votimin, qytetarët do të shprehin preferencat e tyre, për ata që do zgjidhen të qeverisin në nivel vendor.”,- tha Nishani.
Ai shtoi se këtij momenti duhet t’i japim rëndësinë që meriton. “Vota është instrumenti më i fuqishëm në dorën e qytetarëve dhe është me rëndësi për paqen sociale dhe përmirësimin e së ardhmes. Duhet të përpiqemi që me vullnet pozitiv të përbashkët të ndreqim shumë gjëra”, u shpreh Presidenti Nishani. /tesheshi.com/
