Presidenti i Turqisë Recep Tayyip Erdogan ndodhet sot në vizitën e tij zyrtare në Tiranë, ku u prit nga Presidenti Bujar Nishani. Dy krerët e shteteve zhvilluan takimin kokë më kokë, ndërsa rreth orës 12.50 mbajtën një konferencë të përbashkët për shtyp, në të cilën, ndër të tjera folën edhe për ngjarjet e fundit të ndodhura në Kumanovë.
Presidenti Nishani dhe ai turk bënë thirrje për zbatimin marrëveshjes së Ohrit dhe njëkohësisht kërkuan që të hidhet dritë mbi ngjarjet plotë hije e paqartësi të ndodhura gjatë ditëve të fundit në Kumanovë.
“U bëj thirrje faktorëve ligjzbatues të hetojnë sa më parë e të zbardhin sa më parë këtë ngjarje plotë hije dhe paqartësi që ka tronditur jo vetëm Kumanovën, por edhe të gjithë rajonin. Bëj thirrje për frenimin e menjëhershëm të përpjekjeve për ta shndërruar këtë skenë konflikti në më të gjerë dhe për dialog për zbatimin e marrëveshjes së Ohrit”,- tha Presidenti Bujar Nishani.
Ai bëri me dije se i gjithë populli shqiptar i gjendet pranë qytetarëve të Kumanovës, të cilët enden në orët e ankthit për jetën dhe pronën e tyre, si dhe u bëri thirrje atyre të sillen me përmbajtje në këtë situatë.
Nga ana e tij, z. Erdogan u shpreh se mes Shqipërisë dhe Turqisë ka një solidaritet të rëndësishëm në fushën ekonomike, ku kemi një marrëveshje të përbashkët tregtare. Ai u shpreh se në Ballkan ka nga ata që duan të destabilizojnë paqen.
“Ne dëshirojmë që konfliktet në Maqedoni të zgjidhen përmes dialogut dhe të zbatohet marrëveshja e Ohrit. Turqia është një vend që ka vuajtur shumë nga terrorizmi dhe ne e dimë shumë mirë faturën e kësaj lufte. Ne nuk dëshirojmë që një faturë e tillë të paguhet nga vend e dhe popuj të ndryshëm, pavarësisht se çfarë feje apo etnie ata kanë”,- ishin fjalët e Erdoan.
Duke thënë se duhet të bëjmë dallimet e qarta nga ata që fitojnë dhe ata që humbin nga terrori, Presidenti turk u shpreh se në fakt humbin të dyja palët, duke qenë se lufta sjell vetëm vdekje. Numri një i Turqisë nuk la pa përmendur edhe ndërtimin e xhamisë së Namzagjasë në Tiranë, themelet e së cilës do të hidhen sot. Për të ai uroi që punimet të mbarojnë sa më shpejt.
Sot do të organizohet edhe ceremonia e hapjes së xhamisë në Kalanë e Pezës, në një ceremoni të përbashkët mes përfaqësuesve të qeverisë së Shqipërisë dhe asaj të Turqisë. /tesheshi.com/
