Opozita hapur dhe LSI-ja nën rrogoz kanë nisur një ofensivë të fuqishme kundër Fatmir Xhafës, të sapopropozuarit si ministër i Brendshëm, dhe sipas gjasave po shkohet drejt një rezistence të presidentit Bujar Nishani për ta dekretuar kreun e dikasterit të policisë.
Nishani ka vendosur ta shfrytëzojë tërë hapësirën kushtetuese për të verifikuar figurën e Xhafajt tek SHISH-i, por dhe tek DSIK-u, dhe për të vendosur më pas nëse do ta dekretojë ose jo. Por dhe nëse Nishani vendos ta “kalojë” kandidaturën e Fatmir Xhafajt, do të jetë pak i vështirë kalimi i tij në Kuvend. Ngaqë Ilir Meta nuk është shumë i lumtur me emërimin e Xhafajt në krye të Ministrisë së Brendshme, pasi brenda tij “vlojnë” inate të vjetra dhe të reja. Dhe për pasojë nuk përjashtohet mundësia e rrëzimit të kësaj kandidature, jo përmes aleancave fluide, por thjesht duke mos i dhënë shumicën e “artë” prej 71 votash që dekreti i presidentit të kalonte në këtë rast.
Pa përmendur se përse Meta mund ta refuzojë votimin e Fatmir Xhafajt në postin e ministrit të Brendshëm, ajo që mund të themi është se ai nuk e ka për herë të parë votën kundër ndaj Fatmir Xhafajt, dhe pikërisht për postin e ministrit të Brendshëm.
Kështu, në kohën e qeverisjes së fundit të Fatos Nanos, Luan Rama, asokohe ministër i Brendshëm, pati një përplasje fizike me gazetarin Ilir Babaramo dhe u detyrua të jepte dorëheqjen. Njëherësh dhe Ilir Meta, ministër i Jashtëm dhe zv.kryeministër, dha dorëheqjen.
Dy ministritë kryesore asokohe drejtoheshin nga zv.ministra, përkatësisht Ministria e Brendshme nga ish-zv.ministri Igli Toska dhe Ministria e Jashtme nga ish-zv.ministri Luan Hajdaraga. Nano, asokohe kryeministër, për postin e ministrit të Jashtëm propozoi Marko Bellon, që u rrëzua menjëherë, pasi nuk mori votat e duhura. Pas kësaj, teksa mbeti vakant dhe posti i ministrit të Brendshëm, Nano propozoi për këto dy vende përkatësisht Namik Doklen për ministër të Jashtëm dhe Fatmir Xhafajn për ministër të Brendshëm.
Emrat e propozuar nga kryeministri Nano për vendet vakant në qeveri nuk kaluan në Kuvend, edhe pas përpjekjeve të ethshme të kryetarit socialist për të blerë vota, sidomos të deputetëve opozitarë të Berishës.
Në votimin e kryer në Kuvend, deputetët rrëzuan me 64 vota pro, 68 kundra e 5 abstenim, kandidaturën e Namik Dokles për ministër të Jashtëm, dhe me 65 vota pro, 49 kundër, 17 abstenime, kandidaturën e Fatmir Xhafajt për ministër të Rendit. Aleanca fluide mes Metës dhe Berishës i rrëzoi dy ministrat e Nanos. Në të njëjtën kohë, ata votuan në unanimitet dekretimin e presidentit Alfred Moisiu për shkarkimin nga detyra të ministrit të Rendit Luan Rama. Ndërkohë, për ministrat e rinj ka votuar dhe kryetari i partisë Bashkimi për të Drejtat e Njeriut, Vangjel Dule. Pak para fillimit të seancës, përkrahësit e Metës janë shprehur se nuk do të japin votën e tyre kundër qeverisë, por do të abstenojnë. Grupi i Metës është shprehur se qeveria duhet të rikompozohet. Në bazë të Kushtetutës së Republikës, kryeministri Fatos Nano ka të drejtë të propozojë deri në tri herë emra për postet ministrore që mungojnë në kabinetin qeveritar. Nano, edhe pse nuk ka reaguar aspak gjatë seancës, është shprehur se nuk do të ketë rikompozim të qeverisë. Ai nuk ka bërë tentativa për të negociuar me deputetët e Metës. Ndërsa nuk kanë munguar tentativat e Nanos për të blerë deputetë të opozitës. Këtë tentativë e ka denoncuar edhe oponenti i tij socialist në atë kohë, Ilir Meta. Ai tha se me gjithë këtë tentativë, Nano nuk ia doli. Pra në atë kohë Meta, pavarësisht se ishte në përbërje të PS-së, e bllokoi votimin e Xhafajt në krye të Ministrisë së Rendit. Të gjithë e dinë se Nano qeverisi me zv.ministra dhe nuk e kompozoi më qeverinë, ndërkohë që një histori e tillë mund të përsëritet sërish për ministrin e Brendshëm, ndonëse për një periudhë më të shkurtër, më pak se tre muaj. Ndërkohë që Nano i qeverisi më shumë se gjashtë muaj dy ministritë kryesore me zv.ministra.
Me sa duket, për Ministrinë e Brendshme rrezikon të përsëritet e njëjta situatë e 13 viteve të shkuara. Dhe zv.ministra të Brendshëm aktualë janë Stefan Çipa (ka qënë afër një vit ministër i Rendit) dhe Elona Gjebrea, një emër i ri, por me integritet dhe përkrahje ndërkombëtare. Që dhe nëse do të ketë ndonjë krizë numrash në Kuvend dhe Xhafaj të mos aprovohet si ministër nga mungesa e votave të Metës, qeverisja mund të vijojë me zv.ministra. Gjithçka mund të ndodhë në ditët e ardhshme. /tesheshi.com/
