Presidenti i Republikës, Bujar Nishani ka dekoruar oficerin e repartit special RENEA, inspektorin Ibrahim Basha, i cili mbeti i vrarë një ditë më parë në një aksion në fshatin Lazarat.
Kreu i shtetit i ka atribuar atij Dekoratën e Artë të Shqiponjës, me motivacionin “Për merita dhe shërbime të veçanta në luftën me grupet e strukturuara kriminale, për garantimin e rendit dhe sigurisë publike”.
Gjithashtu, dekorata i është dhënë efektivit të ndjerë edhe për kontributet e tij në misionet luftarake në Afganistan dhe Irak, “në mbrojtje të paqes dhe lirisë, duke luftuar kundër terrorizmit ndërkombëtar”.
Oficeri është shpallur “Dëshmor i Atdheut” dhe sot pritet t’I bëhet përcjellja shtetërore në Varrezat e Dëshmorëve në Tiranë. Në mesdite, në xhaminë e Et’hem Beut në Tiranë është zhvilluar ceremonia religjoze pasi Ibrahim Basha ishte një besimtar mysliman i devotshëm
Këtë e ka bërë të ditur edhe Komuniteti Mysliman Shqiptar, i cili me një deklaratë zyrtare ka dënuar vrasjen e oficerit Basha.
“Komuniteti Mysliman i Shqipërisë dënon aktin kriminal ndaj efektivëve të Policisë së Shtetit në Lazarat, ku humbi jetën Ibrahim Basha, efektiv i forcave speciale RENEA dhe mbetën të plagosur dy kolegët e tij, Jetmir Isaji dhe Perlat Hamitaj. Efektivi Ibrahim Basha ra në krye të detyrës shtetërore në luftën kundër krimit, ndërkohë që ishte në përmbushje të detyrës si agjërues i Muajit të Bekuar të Ramazanit. Ai njihej në rrethin e tij si një besimtar dhe njeri i përkushtuar në detyrë. Për këtë lusim Allahun e Madhëruar që ta mëshirojë dhe ta pranojë në xhenetet e Tij të larta.
Komuniteti Mysliman i Shqipërisë i shpreh ngushëllimet më të sinqerta familjes dhe merr pjesë në dhimbjen e saj, ndërkohë lutet për shërim të shpejtë për dy të lënduarit e tjerë të kësaj ngjarjeje të rëndë. Shpresojmë që drejtësia të veprojë sa më shpejt dhe autorët e kësaj ngjarjeje të përballen me forcën e ligjit”, – thuhet në mesazhin ngushëllues të Komuniteti Mysliman i Shqipërisë./tesheshi.com/
