Ditën e sotme nisi viti i ri shkollor në sistemin arsimor publik, ku gjysëm milioni nxënës janë ulur në bankat e shkollës. Më të emocionuarit janë ata që nisin klasën e parë. 30 mijë fëmijë kanë nisur vitin e parë të studimeve të tyre.
Viti i ri shkollor nisi edhe me urimet e ministres së Arsimit, Lindita Nikolla e cila u zotua mes të tjerash se nuk do të ketë më emërime politike në arsim.
Sipas saj, këtë vit shkollor janë rikonstruktuar 44 shkolla dhe ka përfunduar ndërtimi i 18 të tjerave. Megjithatë, Tirana edhe këtë vit do të përballet me shkolla me dy turne, jo vetëm të mesme, por edhe 9-vjeçare, si pasojë e ngarkesës me numrin e nxënësve dhe vonesave në punimet e disa shkollave. /tesheshi.com/
