Siç bën me dije Daily Sabah, nis sot në Mulla (Muğla), në jugperëndim të Turqisë, gjyqi i shumëpritur ndaj trupave që tentuan të eliminojnë presidentin e vendit gjatë përpjekjes së dështuar për grusht shteti të 15 korrikut të vitit të shkuar.
Dhjetëra trupa, saktësisht 44 të pandehur rrezikojnë të dënohen me burgim të përjetshëm për rolin e tyre në komplotin për vrasjen e Erdoganit mbrëmjen e 15 korrikut.
Kryeprokurori Nexhip Topuz e cilësoi si me rëndësi historike procesin gjyqësor ku presidenti është paditës i drejtpërdrejtë.
Gjyqi që pritet të zgjasë më së paku përgjatë tërë këtij viti do të ngjallë interes të madh publik, sipas përfaqësuesit të akuzës. “Nëse komploti do të kishte sukses, gjërat do të ishin dramatikisht ndryshe,” ka deklaruar Nexhip Topuz.
Midis 47 të pandehurve, puçistë të lidhur me organizatën kriminale FETÖ, tre prej tyre janë gjeneralë. Njëri prej tyre është i përfshirë drejtpërdrejt në përpjekjen për vrasjen e Erdoganit, ndërsa dy të tjerë ndihmuan në komplotin në fjalë.
Të vënët para drejtësisë përballen me një sërë akuzash, nga përpjekja për vrasjen e presidentit te krimet kundër kushtetutës.
Një vend të posaçëm në sallën e gjyqit do të ketë për familjarët e të vrarëve nga puçistët në përpjekjen për eliminimin e presidentit turk. /tesheshi.com/
