Bashkia e Tiranës nisit sot aksionin e paralajmëruar prej javësh për pastrimin e qytetit, një premtim i fushatës elektorale për kryetarin Veliaj. Ky i fundit ishte në Farkë, ku së bashku me aktivistët u bëri thirrje qytetarëve të Tiranës të bashkohen në këtë përpjekje e si tha “të japin një dorë” në pastrim.
Në disa zona në kryeqytet, mësohet se janë mobilizuar trupa të Ushtrisë, duke i dhënë aksionit një dimension “luftarak” ashtu si është edhe motoja e përdorur shpesh nga Veliaj që i ka shpallur “luftë” zhulit në Tiranë. Mjetet e rënda të ushtrisë mësohet se do të jenë në dispozicion të aksionit të pastrimit.
“U bëj thirrje të gjithë qytetarëve që të dalin. Na duhet vetëm një orë kohë e gjithësecilit prej jush për të patur një qytet më të pastër. E nisëm nga Farka dhe unë do të jem edhe në disa njësi të tjera gjatë ditës. Tirana do të ngryset më e patër seç u gdhi, por kjo nuk është e mjaftueshme”, tha Veliaj në nisje të ditës së “pastërtisë”.
Këshilli Bashkiak i Tiranës vendosi një natë më parë, të dyfishojë gjobat ndaj atyre që ndotin ambjentin, një masë kjo që shkon në të njëjtën linjë me objektivat e aksionit për pastrimin. /tesheshi.com/
