Presidenti amerikan Joe Biden ka uruar të hënën myslimanët me rastin e muajit të shenjtë të Ramazanit dhe ka shprehur dhimbjen e tij për vuajtjet e dhimbshme të njerëzve në Rripin e Gazës për shkak të luftës izraelite që po vazhdon që nga 7 tetori i vitit të kaluar.
Ai tha se vuajtjet e popullit palestinez janë në ballë të mendjes së tij ndërsa muslimanët në mbarë botën fillojnë muajin e agjërimit të Ramazanit.
Kjo shprehje hipokrite e pikëllimit për gjendjen e vështirë të palestinezëve vjen ndërsa Biden vazhdon të ofrojë mbështetjen më të fortë ushtarake, inteligjente dhe diplomatike për Izraelin. Administrata e tij vazhdon të furnizojë Izraelin me armë. SHBA-ja ka vënë tre herë veton ndaj rezolutës së Këshillit të Sigurimit të OKB-së që kërkon armëpushim në Gaza.
“Sonte – ndërsa hëna e re shënon fillimin e muajit të shenjtë islamik të Ramazanit – Jill dhe unë dërgojmë urimet dhe lutjet tona më të mira për myslimanët në të gjithë vendin tonë dhe në botë”, shkroi Biden.
“Muaji i shenjtë është një kohë reflektimi dhe ripërtëritjeje. Këtë vit vjen në një kohë dhimbjeje të jashtëzakonshme. Lufta në Gaza i ka shkaktuar vuajtje të tmerrshme popullit palestinez”, shtoi ai.
Biden në mënyrë hipokrite u përpoq të ngushëllonte muslimanët në Gaza duke premtuar se SHBA do të vazhdonte përpjekjet për më shumë ndihma humanitare dhe do të punonte “gjatë gjithë kohës për të vendosur një armëpushim të menjëhershëm dhe të qëndrueshëm për të paktën gjashtë javë”. /tesheshi.com/
