Edi Rama ka thënë do fjalë me peshë për median publike para se të vinte në pushtet, por që i ka përsëritur dhe me të krijuar qeverinë: “Do t’ia kthej TVSH-në publikut”.
Veçse prej dy vitesh televizioni publik shqiptar, TVSH-ja, dhe agjencia e lajmeve shtetërore, ATSH-ja, nuk janë entet publike që t’i informojnë shqiptarët për atë që nuk e marrin nga ekranet komerciale dhe portalet e ndryshme marramendëse, por janë kopja e keqe e medias private. Një kopje që synon të matet me zullumin apo scoop-in që përhapin çdo ditë titrat trallisëse, që e kthejnë në lajm çdo përplasje biçiklete apo çdo fjalë ministri.
Ndërkohë që në një media serioze publike, siç ndodh kudo në Europë, apo edhe në rajon, pasqyron dhe promovon të mirat dhe resurset e vendit që nuk kanë mundësi të jenë pjesë e hapësirës mediatike për shkak të marketingut shkatërrues.
Para një jave, me një operacion “blitz”, me një vendim të Këshillit Drejtues në amulli, u emërua drejtori i ri i Informacionit në TVSH; emërim që është thjesht dërgimi i një personi të afërt të partisë në pushtet në median më të madhe publike në vend. Thënë ndryshe, pikë për pikë siç ka ndodhur dhe herë të tjera. Një punonjës i zyrës së shtypit të PS-së dërgohet të mbulojë propagandën në televizionin publik shqiptar!
Me dështimin e zgjedhjes së drejtorit të përgjithshëm të RTSH-së, pas përplasjeve edhe brenda mazhorancës, ky institucion është në vdekje klinike, ndërkohë që agjencia shtetërore e lajmeve është katandisur në një ent të shkurtuar, ku emetohen njoftimet e shtypit në versionin original.
Këto dy institucione të rëndësishme, ku duhet të jetë këndi ku publiku të shohë të përçohen shqetësimet e tij, janë kthyer realisht në “guva” ku gjallojnë zyrtarët partiakë, të cilët i përdorin zyrat e shtetit për një punë të dytë suplementare.
Një zyrtar i lartë në median publike shqiptare zotëron një kompani të njohur shërbimesh funerale, që e ka reklamuar edhe në faqen e tij të rrjeteve sociale, ku flet për standarde dhe shërbim të nivelit të lartë!
Në fakt, vetëm ky shembull është pasqyrim i një modeli që i ka kthyer “shtëpitë e lajmit” në zyra ku dikush pret t’i bëjë shërbimet e fundit…
Natyrisht, me cilësi e standarde! /tesheshi.com/
