Erërat e globalizmit në shekullin XXI kanë bërë që zhvillimi i teknologjisë, shkencës, informatikës dhe komunikimit masiv të jenë dukshëm më të zhvilluara se sa ma parë. Përderisa në njërën kemi një hiper zhvillim të tillë, në anën tjetër pikërisht ky hiper zhvillim ka shpërfaqur edhe një sërë efektesh negative në shoqëri. Është fakt që sot jeta moderne nuk mund dot të paramendohet pa një teknologji dhe zhvillim të tillë, për shkak të nevojave dhe rrethanave në të cilën gjendet shoqëria aktualisht. Por gjithashtu ky zhvillim ka zbehur dukshëm edhe raportet ndër shoqërore, besa edhe ato ndër familjare. Sot, jemi dëshmitarë të asaj që në mjediset tona sociale më shumë fokusi është i orientuar kah shfrytëzimi i mediave sociale se sa kah komunikimi i ndërsjellët i cili dikur ka qenë tepër i fuqishëm. Në këtë kontekst shembull mund ta marrim institucionin e Odës, institucion ky i cili dikur në traditën shqiptare ka luajtur rolin mikpritës dhe në këtë institucion janë realizuar fejesa, martesa, janë bërë pajtimet e gjaqeve, si dhe shumë tradita të tjera për të cilat nuk do të mjaftonte që të flasim me pak fjalë. Kurse sot, rrjetet sociale, në veçanti komunikimi virtual është gjithnjë e më shumë duke e zëvendësuar edhe këtë institucion përmes formave dhe mënyrave të ndryshme. Andaj, traditat që dikur janë manifestuar me shumë zell dhe vullnet, sot realizohen përmes rrjeteve të tilla sociale. Madje, kjo ndërlidhet me gjendjen faktike pasi që interneti në Kosovë, por edhe në Shqipëri shfrytëzohet diku rreth 97% përkatësisht 65%, gjë që tregon se shqiptarët në rajon janë të parët për nga shfrytëzimi i këtij shkopi magjik.
Sido që të jetë, këto rrjete sociale të cilat njëherit janë prore të globalizmit, janë ato rrjete të cilat kanë ndikuar që edhe jeta dhe mjedisi social të ndryshojë dukshëm. Një gjë e tillë vërehet edhe gjatë ndejave të ndryshme familjare, gjatë bisedave/komunikimeve të ndryshme me familjar, miq, koleg dhe të tjerë. Kjo pasqyron dinamikën e jetës, por gjithashtu pasqyron edhe ndikimin e rrjeteve sociale të cilat çdo ditë e më tepër po e cenojnë edhe privatësinë tonë qoftë si individ po ashtu edhe si shoqëri.
Përdorimi i rrjeteve të tilla sociale në mjediset urbane, por edhe ato rurale tashmë është prezentë edhe në kafenetë e ndryshme, të cilat pothuajse çdo herë janë të stërmbushura. Përderisa ekziston një papunësi dhe varfëri tejet e lartë me shifra alarmante, në anën tjetër kafenetë luajnë rolin e atashimit psikologjik i cili sado kudo edhe ato lidhje të zbehta të cilat vuajnë nga një gjendje anomike sipas Dyrkemit, mundohet që t’i ofron ose t’i kooperon.
Në fakt, kultura e kafesë përshkruan një atmosferë shoqërore ose një sërë sjelljesh sociale shoqëruese që varen shumë nga kafja ose shija e kafes. Andaj, si në zonat urbane po ashtu edhe në ato rurale, kafenetë luajnë një rol të kohezionit social dhe integrimit shoqëror. Kjo për shkak se në këto mjedise sociale ekzistojnë struktura të ndryshme shoqërore, të cilat kanë një ndërveprim social me njëri tjetrin dhe kryesisht frekuentimi i tyre lidhet me shumë aspekte që nga shfrytëzimi i rrjetit (wifi-së) e deri tek takimet e ndryshme. Megjithëse, në pjesën më të madhe të rasteve vërehet se efekti i komunikimit të dikurshëm ka humbur atë esencën e origjinalitetit të tij dhe tashmë kryesisht komunikimi zhvillohet ad hoc dhe fokusi më i madh është tek teknologjia e re e cila e tjetërsuar individin dukshëm. Në këtë segment ajo që bie në sy është fokusi kryesisht i moshave të reja dhe përdorimi i telefonave të mençur, duke u orientuar kah shfrytëzimi i rrjeteve sociale. Madje, në këto ambiente shpeshherë primare është pyetja për pasin e wifi-së se sa ndoshta komunikimi me të tjerët. Prandaj, me fjalë të tjera, kafenetë tashmë janë shndërruar në një ambient social i cili përveç shfrytëzimit të kohës së lirë, freskimit, zhvillimit të takimeve dhe komunikimit, ato ofrojnë edhe mundësi tjera sidomos të shfrytëzimit të internetit (pa pagesë), i cili është konsideruar si “shpikja e shekullit”. Pra, kafenetë si ambiente sociale përderisa dikur kanë qenë vetëm një vend për takim ose vend për kalimin e kohës së lirë, sot nuk mund të thuhet e njëjta gjë, sepse ato ofrojnë shumë elemente të cilat ndikojnë që edhe klientët t’i vizitojnë më shumë, ndoshta për shkak të prezencës së strukturave të ndryshme të shoqërisë, ambientit, shfrytëzimi të internetit, si dhe elementeve të tjera të cilat dikur kanë munguar. /tesheshi.com/
