Kryeministri izraelit ka kërkuar ditën e djeshme përjashtimin e ligjvënësve arabo-izraelitë nga parlamenti për shkak se ata vizituan së fundi familjet e agresorëve të pretenduar palestinezë.
Netanyahu i akuzoi parlamentarët se nuk pranonin të integroheshin në shoqërinë izraelite, “duke u vajtur për ngushëllim familjeve të vrasësve”.
“Do të doja të shqyrtoheshin ndryshime të reja legjislative për të garantuar që kushdo që vepron në këtë drejtim nuk do të shërbejë në parlamentin izraelit,” deklaroi ai.
Që nga fillimi i tetorit të vitit të kaluar ka patur një tensionim të shtuar të situatës në territoret palestineze dhe përplasje të vazhdueshme. 160 janë palestinezët e vrarë nga forcat izraelite të sigurisë.
Parlamentarët arabo-izraelitë të parlamentit izraelit janë akuzuar pareshtur gjatë kësaj kohe për nxitje të valës së dhunës, nga e cila kanë gjetur vdekjen 30 izraelitë e të huaj.
Nisma e kryeministrit izraelit u nxit pasi një gjykatë izraelite e dënoi me gjashtë muaj pezullim nga detyra parlamentaren Hanin Zoabi për fyerje të zyrtarëve publikë. Gjithashtu ajo do të paguajë një shumë të caktuar si gjobë, si dhe nuk do të ketë imunitet parlamentar.
Tre parlamentarë, Zoabi, Zahalka dhe Bassel Ghattas u takuan më herët me familjarët e disa palestinezëve të vrarë nga forcat izraelite me pretendimin se po i sulmonin izraelitët. /tesheshi.com/
