Lirije Gjiknuri, është nëna e ministrit të Infrastrukturës dhe Energjisë, Damian Gjiknuri. Ajo jeton me djalin e saj, vëllain e ministrit, ndërsa reagoi sot në lidhje me vjedhjen e banesës. Gazeta zyrtare e PD-së, shkruante se nga banesa janë marrë thasë me lekë, ndërsa policia mban të fshehur ngjarjen.
Por Lirije Gjiknuri sqaron se autorët kanë marrë vetëm 300 mijë lekë, kursime të pensioneve të saj.
“Nuk ka as miliona asgjë, grabitën 3 milionë lekë të vjetra të mbledhura nga pensioni im”, u shpreh ajo në një reagim, raporton shqiptarja.com, ndaj lajmit të botuar në gazetën Rilindja Demokratike se nga shtëpia e ministrit hajdutët morën thasë me para.
Grabitja në banesën e Lirije Gjiknurit ndodhi mesditën e djeshme, ku sipas raportimeve është kryer nga 3 persona. Policia e Tiranës po heton ngjarjen, ndërsa ka shoqëruar disa persona, por pa mundur ende të arrijë te autorët, të paktën deri mesditën e sotme. /tesheshi.com/
