Presidenti turk Rexhep Tajip Erdogan tha se Shtetet e Bashkuara i kishin ofruar Turqisë shitjen e avionëve luftarakë F-16 në këmbim të një investimi të mëparshëm në programin F-35 nga i cili Ankaraja u hoq pasi bleu një sistem raketash mbrojtëse nga Rusia.
Reuters raportoi në fillim të këtij muaji se Turqia i kishte kërkuar Shteteve të Bashkuara të blinin 40 Lockheed Martin F-16 dhe rreth 80 pajisje modernizimi për avionët ekzistues.
Erdogan tha të dielën se Turqia dëshiron kompensim për 1.4 miliardë dollarë investime në programin F-35 dhe se kjo është duke u negociuar.
“Ne kemi thënë se do të ndërmarrim çdo hap të nevojshëm për të përmbushur nevojat mbrojtëse të vendit tonë,” tha presidenti turk.
Ankaraja ka porositur më shumë se njëqind avionë F-35, të prodhuar nga Lockheed Martin, por Shtetet e Bashkuara hoqën dorë nga ajo shitje në vitin 2019, pasi Turqia bleu sistemin raketor mbrojtës rus S-400.
Marrëdhëniet midis dy ushtrive më të mëdha të NATO-s janë përkeqësuar gjatë pesë viteve të fundit për shkak të mosmarrëveshjeve mbi Sirinë, afrimit të Ankarasë me Moskën, ambicieve të Turqisë në Mesdheun lindor, padisë amerikane kundër një banke turke dhe gjendjes së të drejtave të njeriut dhe lirive të mediave në Turqi.
Vendimi për të blerë S-400 rezultoi gjithashtu me sanksione amerikane.
Në dhjetor 2020, Uashingtoni vendosi në listën e zezë drejtorinë e industrisë turke të mbrojtjes, shefin e saj Ismail Demir dhe tre punonjës të tjerë.
Që atëherë, Shtetet e Bashkuara kanë paralajmëruar vazhdimisht Turqinë që të mos blejë armë shtesë ruse.
Erdogan tha se Ankaraja ende planifikon të blejë një seri të dytë të sistemeve S-400, të cilat mund të thellojnë më tej mosmarrëveshjen me Uashingtonin.
Kërkesa për të blerë aeroplanë amerikanë do të jetë e vështirë për të marrë miratimin e Kongresit Amerikan.
Demokratët dhe republikanët në atë trup pajtohen në një përpjekje për të detyruar qeverinë Joe Biden të rrisë presionin ndaj Ankarasë, kryesisht për shkak të blerjes së armëve ruse dhe situatës së të drejtave të njeriut. /tesheshi.com/
