Partia Socialiste dhe Lëvizja Socialiste për Integrim kërkuan nga KQZ-ja të shtyjë afatin e regjistrimit të partive politike në zgjedhje, duke argumentuar se janë duke u përpjekur për të negociuar me Opozitën që edhe ajo të jetë pjesë e procesit të votimit më 18 qershor.
Në një kërkesë të dorëzuar në KQZ, thuhet se PS dhe LSI si dhe forcat e tjera të Aleancës për Shqipërinë Europiane, janë në përpjekje të vazhdueshme për të negociuar me opozitën, për të mundësuar pjesëmarrjen e plotë të të gjithë spektrit ekzistues politik të vendit në zgjedhjet për Kuvendin e Shqipërisë, të datës 18 qershor.
Forcat e majta e argumentojnë kërkesën me kontekstin social-politik në Shqipëri, që, sipas tyre, nuk mund të neglizhohet nga asnjë institucion publik në vend dhe aq më pak nga Komisioni Qendror i Zgjedhjeve.
“Në gjykimin tonë, tejkalimi i afateve të parashikuara nga nenet 64 dhe 65 të Kodit Zgjedhor me disa ditë, ndërkohë që nuk do të sillte asnjë pasojë penalizuese, nga ana tjetër do të kontribuonte për të krijuar hapësira për të siguruar një proces sa më gjithëpërfshirës”, lexohet në kërkesën e nënshkruar nga shefat e grupeve parlamentare të PS-së dhe LSI-së. /tesheshi.com/
