Lulzim Basha pritet që të zhvillojë një takim të rëndësishëm në Departamentin Amerikan të Shtetit, në prezencë të një zyrtari të lartë por edhe të shefit të diplomacisë shqiptare, Ditmir Bushati.
Një burim diplomatik i tha tesheshi.com se bëhet fjalë për një negociatë të nisur nga ambasadori amerikan në Tiranë, Donald Lu, i cili me iniciativën e tij ka ndërmjetësuar tek shefat tej oqeanit që negociatat për zgjidhjen e krizës në Shqipëri të zhvendosen në Uashington, pasi një pjesë e Partisë Demokratike, përgjithësisht ajo në krye të saj nuk beson tek ai, duke qenë se e kanë shpallur “mik të kryeministrit Rama”.
Burime diplomatike bënë të ditur se zyrtarë të lartë të DASH kanë deklaruar mëse njëherë besimin për ambasadorin Lu, madje e kanë udhëzuar që të udhëheqë negociatat në Tiranë me palët.
Por ka qenë vetë Lu i cili në një kabllogram ka bërë të qartë situatën se do të ishte më mirë që negociatat të bëhen nga qendra, pasi do t’i japë një justifikim më të madh Lulzim Bashës që të lërë çadrën dhe të futet në Parlament për të miratuar komisionet e Vetingut.
Është e njëjta skemë e korrikut të vitit të kaluar, ku Donald Lu mundësoi një vizitë në Uashington të Lulzim Bashës, por edhe solli në Tiranë Victoria Nuland që të bënte një konçension për Bashën, që ishte barazia në komisionet e Vetingut.
Bushati edhe Basha të kenë takime në Uashington me zyrtarin e lartë të DASH, Hoyt Yee dhe pritet që të vendosin formulën e daljes nga kriza.
Edhe pse nuk bëhet e ditur se çfarë po negocohet, mësohet se një gjë është arritur:
- Zgjedhjet e 18 qershorit nuk do të shtyhen.
- Nuk do të ketë qeveri teknike, ndërkohë që do të merren një grup me masash-garanci për zgjedhjet parlamentare.
Një nga këto, mësohet se është pikërisht identifikimi elektronik. Pra që çdo zgjedhës do të identifikohet me një çip të veçantë nëpërmjet shenjave të gishtave. Ky server do të prodhohet, administrohet dhe kontrollohet vetëm nga amerikanët.
Shqiptarët i kanë shenjat biometrike në letërnjoftime dhe ka shumë frikë se do të ketë hakime, sidomos nga ana e rusëve.
Një senator i rëndësishëm amerikan deklaroi se ka të dhëna të qarta se Rusia mund të prishë zgjedhjet në Shqipëri.
“Është e provuar tashmë ndërhyrja ruse në Shtetet e Bashkuara, por po ashtu është e qartë ajo që po ndodh në Francë, por edhe në shtete të tjera të Europës Perendimore. i bëj apel njerëzve në Shqipëri të jenë të kujdesshëm. Në vecanti një apel kam për mediat: kontrolloni burimet tuaja. Kini kujdes për ato që thuhen. Do të promovohen shumë gjëra të rreme. Trupat zgjedhore këtu duhet të jenë të kujdesshme për kontaktet e tyre. Është e sigurt që ekziston një program rus për të ndikuar në zgjedhje”, tha aenatori demokrat amerikan Robert Torriceli, në një interviste per Vizion Plus.
Dhe pikërisht për këtë shqetësim amerika ka marrë afër Lulzim Bashën dy ditë pasi kreu i opozitës është takuar me ambasadorin rus në Tiranë, Aleksandër Karpushin.
Siç mësohet, lideri i opozitës shqiptare do të zhvillojë kontakte të ndara dhe jo ballazi me Ditmir Bushatin dhe zyrtarin e lartë të DASH.
Ministri i jashtëm shqiptar do të flasë pas takimit të Hoyt Lee me Bashën dhe do të transmetojë vullnetin e Kryeministrit Rama për të negocuar një zgjidhje për mbylljen e krizës politike në Tiranë.
Fakt është se këto negociata janë bipolare dhe mungon Ilir Meta. /tesheshi.com/
