Ka reagime edhe me armë në Veri të Kosovës, ku si pasojë një polic është plagosur e flitet dhe për një të dytë. Operacioni i fuqishëm i Policisë ka çuar në afro 30 të ndaluar e katër arrestime, në këto të fundit edhe zyrtarë të Veriut nga nacionaliteti serb. Flitet dhe për barrikada në rrugë madje. Kësaj situate po i fryn dhe Beogradi, ndaj dhe ministri i Jashtëm Behgjet Pacolli ka tentuar të sqarojë se nuk ka asgjë me fond nacional në këtë aksion.
“Policia e Kosovës po kryen një operacion në Kosovën veriore për të arrestuar qytetarë të Kosovës duke përfshire policë të cilët janë pjesë e një rrjeti që ka qenë thellësisht i përfshirë në kontrabandë, ryshfet, keqpërdorimin e pozitës zyrtare dhe aktivitete të tjera të krimit të organizuar.
Ky operacion ka qenë i përgaditur qe disa muaj dhe është pjesë e përpjekjeve më të mëdha që Kosova po ndërmerr për të forcuar rendin dhe sundimin e ligjit në të gjithë vendin. Ne kemi parë operacione të ngjashme në ditët e fundit në pjesë të tjera të Kosovës”, shkruan Pacolli, duke vijuar më tej të thotë se: “Kosova dëshiron të tregojë vullnetin e saj për të luftuar krimin e organizuar, korrupsionin dhe keqpërdorimin e pozitës zyrtare dhe ne i bëjmë thirrje të gjithëve për të mbështetur veprime të tilla.
Unë i bëj thirrje Serbisë të mos abuzojë politikisht me një operacion të thjeshtë të policisë. Iu bëj thirrje atyre të mbështesin luftën kundër krimit të organizuar dhe të mos kundërshtojnë atë. Ajo që ka rëndësi është mirëqenia e të gjitha komuniteteve që jetojnë në Kosovë dhe qeveria e Kosovës garanton që kjo është me interes të lartë.
Unë i dënoj thirrjet e qeverisë serbe që madje e kanë thirur ushtrinë të jetë e gatshme për shkak të një operacioni të thjeshtë policor kundër rrjeteve të krimit të organizuar”, përfundon mesazhi i kreut të diplomacisë kosovare. /tesheshi.com/
