PS mendon se SPAK duhet të merret tashmë dhe me sherret në Kuvend, ato mes deputetëve. Kështu, ajo ka kallëzuar në Prokurorinë e Posaçme deputetin demokrat Bledjon Nallbati, me akuzën e “goditjes për shkak të detyrës”. Padia vjen pas grushtit që Nallbati i dha kolegut të tij socialist Vullnet Sinajt në Kuvend, në seancën e 30 shtatorit.
Kreu i grupit parlamentar të PS-së, Bledi Çuçi, i cili ka firmosur kallëzimin, thotë se nuk do të tolerojnë asnjë akt dhune.
“Sot, në emër të Grupit Parlamentar të Partisë Socialiste firmosa kallëzimin penal për deputetin Bledjon Nallbati për dhunën fizike të ushtruar në seancën e fundit ndaj deputetit Vullnet Sina. Qëndrimi ynë është i qartë. Nuk do të tolerojmë asnjë akt dhune dhe refuzojmë këdo që e konsideron dhunën si mundësi për të shprehur mospajtimin. Ftojmë organet ligjzbatuese të bëjnë punën e tyre dhe t’i shkojnë deri në fund ngjarjes së 30 tetorit në Parlament”, shkruan Çuçi.
Në dokumentet që shoqërojnë aktpadinë, socialistët pretendojnë se vërtetohen katër raste të goditjes për shkak të detyrës ku sipas Kodit Penal, kjo vepër dënohet nga gjoba deri në tre vite burgim.
Nga ana tjetër, Nallbati u shpreh i penduar duke thënë se një gjest i tillë nuk nderon askënd, e ndërsa Sinaj tha se e kishte falur, pasi nuk ka asgjë personale me të, mirëpo konfirmoi se do të ishte pro çdo vendimi që grupi i PS-së do të merrte kundër demokratit. /tesheshi.com/
