Kryeministri Edi Rama zhvilloi dje pasdite një takim në Tiranë me krerë të partive shqiptare në Maqedoninë e Veriut.
Në këtë takim ishin të pranishëm Ali Ahmeti i BDI-së, Afrim Gashi i Alternativës, Menduh Thaçi i PDSH-së, Arben Taravari i Aleancës për Shqiptarët, si dhe zëvendëskryeministri Artan Grubi.
“Gëzuar! Qoftë një vit i mbarë për shqiptarët kudo ku janë”, shkruan Kryeministri Rama, ndërsa ndau në rrjetet sociale foton e këtij takimi.
Pjesë e takimit ishte edhe ministrja për Europën dhe Punët e Jashtme, Olta Xhaçka.
Në takim nuk ishte i pranishëm kreu i Lëvizjes Besa, Bilal Kasami.
Për atë se çfarë u bisedua konkretisht, foli pas takimit kreu i BDI-së, Ali Ahmeti, ku “zbuloi” një formulë për frenimin e ikjeve në hapësirat shqiptare prej shqiptarëve.
“E tërë vëmendja u përqendrua tek zhvillimet e përbashkëta. Pati një ligjërim nga kryeministri Rama për sfidat dhe përpjekjet e përbashkëta që janë bërë si dhe përpjekjet që duhen bërë bashkarisht drejt hapjes së kapitullit të parë për anëtarësim në Bashkimin Europian. Puna e lodhshme që është bërë pas krahëve, shumë më e vështirë do jetë rruga që do kemi përpara. Kështu që të dy vendet duhet të bashkëkoordinohen që ta shkurtojmë rrugën drejt anëtarësimin drejt BE-së për të ndaluar emigracionin e madh nga dy vendet tona. U përmend edhe shembulli i Spanjës dhe Portugalisë që në momentin që ato janë bërë anëtarë të BE-së, pjesa dërrmuese e spanjollëve dhe portugezëve ishin kthyer në vend. Ky ishte thelbi i bisedës. Largimi nga vendi mund të ndalet vetëm nga përafrimi i standarteve perëndimore. Ky ishte thelbi i bisedës. Porosia e Ramës ishte për të bashkëvepruar për çështje të ndryshme s ai takon shqiptarëve”, tha Ahmeti.
Sa i takon bojkotit të Lëvizjes Besa në këtë takim, Ahmeti tha se përfaqësuesit e kësaj partie politike kishin treguar papjekuri politike duke mos marrë pjesë.
“Lëvizja Besa ka treguar papjekuri politike, nuk duhet të ishin shmangur një takimi të tillë, qofshin në Tiranë apo në Shkup. Është mirë që njerëzit të na shohin së bashku”, shtoi Ahmeti. /tesheshi.com/
