Nga Mensur Krasniqi
Qeveria ka filluar mbledhjen e rregullt në të cilën në rend dite është vendosur edhe ndotja e ajrit në Tetovë dhe kërkesa për mbylljen e fabrikës së “Jugohrom”-it që llogaritet si ndotësi më i madh në Pollog. Informatat e para për ndonjë vendim eventual pritet të dalin më vonë gjatë mbrëmjes.
Jo zyrtarisht ditë më parë u mësua se komisioni ekonomik i qeverisë ka kaluar kërkesën për mbylljen e “Jugohrom”-it dhe të njëjtën ia ka dërguar kabinetit të kryeministrit Gruevski.
Kjo temë është dashur të hapet mbrëmë edhe në mbledhjen e kryesisë qendrore të BDI-së. Por, as nga partia e Ahmetit nuk kanë lëshuar asnjë informatë zyrtare për opinionin. Jo zyrtarisht mësohet se zyrtarë të lartë të kësaj partie janë mbledhur mbrëmë në Reçicë të Vogël, por nuk dihet se çfarë kanë biseduar rreth ndotjes së ajrit në Tetovë.
Ndryshe të premten skadon ultimatum i organizatave joqeveritare nga Tetova të cilat në protestat e javës së kaluar kërkuan mbylljen e “Jugohrom”-it, dislokimin e deponisë në hyrje të qytetit dhe rregullimin e kaosit të komunikacionit. Nëse nuk përmbushën këto pika, organizata “Eco Guerilla” dhe Lëvizja “Nëna dhe fëmija” kanë paralajmëruar bllokim të rrugëve, Komunës dhe institucioneve tjera në Tetovë si dhe një protestë masive edhe në Shkup. /tesheshi.com/
