Të hënën në Berlin do të mbahet Samiti i 10-vjetorit të Procesit të Berlinit të vendeve të Ballkanit Perëndimor, ku temë kryesore e diskutimit do të jetë thellimi i mëtejshëm i bashkëpunimit rajonal.
Përveç presidentëve të shteteve dhe qeverive të gjashtë vendeve të Ballkanit Perëndimor (Shqipëria, Bosnja dhe Hercegovina, Mali i Zi, Kosova, Maqedonia e Veriut dhe Serbia), në samit marrin pjesë edhe anëtarët e Bashkimit Evropian të përfshirë në process.
Në kuadër të takimit të samitit, në pjesën më të madhe do të bisedohet për bashkëpunimin rajonal dhe tregun e përbashkët rajonal, si dhe për axhendën e gjelbër për Ballkanin Perëndimor.
Gjithashtu është planifikuar nënshkrimi i një deklarate të përbashkët për një plan të ri veprimi për një treg të përbashkët rajonal dhe një marrëveshje për akses më të lirë në institucionet e arsimit të lartë brenda rajonit.
Procesi i Berlinit, nga Angela Merkel
Rezultatet e samitit do të prezantohen në një konferencë të përbashkët për shtyp nga kancelari gjerman Olaf Scholz dhe presidentja e Komisionit Evropian Ursula von der Leyen, e cila merr pjesë në takim në emër të BE-së.
Procesi i Berlinit u nis në vitin 2014 nga kancelarja gjermane Angela Merkel dhe qëllimi kryesor i formatit që në fillim ishte afrimi i vendeve të rajonit me Bashkimin Evropian për të përmbushur premtimin e dhënë në vitin 2003, në samitin e Selanikur, kur vendeve iu premtua anëtarësimi në Bashkimin Evropian.
Vitet e fundit, Procesi i Berlinit ka fituar rëndësi për shkak të ndikimit në rritje të fuqive si Rusia, Kina dhe Turqia në rajon, të cilat BE-ja dëshiron t’i pengojë.
Ndër sukseset më të mëdha të Procesit të Berlinit është nënshkrimi i një marrëveshjeje për bashkëpunim ekonomik rajonal, heqja e vizave dhe njohja reciproke e diplomave. /tesheshi.com/
