Nga Mensur Krasniqi
Shteti maqedon pritet të zbrazë burgjet për ta mbushur arkën shtetërore. Të dënuarit në Maqedoni, për burg pritet të kenë shtëpinë, ama pa lëvizur që aty, pasi dënimin do e kryejnë duke mbajtur në gjymtyrë dorëza(hallkë) elektronike, që do u pamundësojë të dalin prej aty e të shijojnë lirinë.
Kjo gjithë në interes të zbrazjes së burgjeve, të cilat janë të tejmbushura; por për më tepër, kursimit të një sasie të madhe fondesh që shkon si kosto për trajtimin e tyre.
Kjo është paraparë në një projektligj, ende në fazë hartimi, e që mund të implementohet nga viti i ardhshëm.
Sipas llogarive të bëra nga institucionet e linjës, nëse 1 mijë të dënuar, në vend të burgut, dënimin do e vuajnë në shtëpi, shteti do të kursente deri në 5 milion euro në vit.
Projektligji parasheh që ndërmjet masave alternative për dënim, të jetë dhe ai dorzës(hallkës) elektronike që të burgosurit e gjykuar për vepra më të lehta penale të munden ta vuajnë dënimin në shtëpi dhe të mos jenë ngarkesë shtetërore.
Njëkohësisht thuhet që ky projektligj do të ketë edhe ndikim social pozitiv, meqë kryerësit e veprave penale më të lehta nuk do të përzihen me të dënuarit për vrasje ose për vepra të tjera të rënda penale.
“Supozojmë që 25 përqind nga kryerësit e veprave penale me rrezikshmëri të vogël dhe me rrezikshmëri të mesme do të marrin dorëza(hallka) elektronike. Në krahasim me këta, ata me rrezikshmërisë të lartë do jenë 50 përqind nga 100 përqindëshi që po ashtu do të marrin dorëza(hallka) dhe do të jenë nën mbikëqyrje elektronike”, thonë nga Ministria e Drejtësisë.
Supozohet që kohëzgjatja e mbikëqyrjes do të jetë nga 60 ditë për kryerësit e veprave penale me rrezikshmëri të vogël, 90 ditë për ata me rrezikshmëri të mesme dhe të lartë, dhe 180 ditë për kryerësit e veprave penale me rrezikshmëri shumë të lartë.
Mesatarisht sipas Drejtorisë për Ekzekutimin e Sanksioneve, shpenzimet ditore për një të burgosur kushtojnë 950 denarë.
“Ne llogaritëm që sistemi provë i dorzës(hallkës) elektronike mesatarisht do kushtojë 20 denarë në ditë( llogaritja është bazuar në 5 mijë e 300 raste në nivel vjetor). Duhet të theksohet që shpenzimet për një të burgosur do të rriten, ashtu sikurse zvogëlohet numri i të burgosurve. Sidoqoftë, ashtu si do të rriten standardet gjatë kalimit të kohës, ashtu edhe do rriten shpenzimet e personave të burgosur”, shprehen nga Drejtoria e Ekzekutimit të Sanksioneve.
Sipas kompetentëve nga Drejtoria, me këto masa të reja alternative për vuajtjen e dënimit me burg, do të zgjidhet problemi i stërmbushjes së burgjeve, do të zvogëlohen shpenzimet dhe do të sigurohet mënyrë më e mirë për rehabilitimin dhe resocializimin e të burgosurve.
Këtë masë të re alternative e ka komentuar edhe aktivistja për të drejtat e njeriut, Meri Nikolova ku përmes statusit të saj në facebook ka shkruar se burgjet janë të stërmbushura dhe se kushtet janë horror.
“Nëse sot po i shihni këta në fotografi, nesër mund të jeni edhe ju”, ka shkruar Nikolova, duke kërkuar mobilizim për gjendjen e rëndë në burgje dhe përmirësimin e të kushteve për të burgosurit.
Sa për ilustrim, ndonëse kapaciteti i burgut të Idrizovës është 800 të burgosur, në të mbahen të mbyllur 1.600 të burgosur. /tesheshi.com/
