Nuk kanë munguar as në orët e mbrëmjes së të hënës sfidat tërheqëse në kampionatet elitare të Europës.
Një e tillë ishte ajo që mbylli javën e 15-të të kampionatit spanjoll, Vilareal – Atletiko e Madridit.
Njohur ndryshe dhe si “nëndetësja e verdhë”, Vilareali fitoi pastër, 3-0, ndaj skuadrës së kryeqytetit spanjoll. Trigueros dhe J. Dos Santos u dhanë epërsinë e dyfishtë vendasve në pjesën e parë me golat e tyre, ndërkohë që rezultati final u vulos në minutën e 93-të, kur shënoi Soriano.
Fitorja e ngjiti Vilarealin në vend të katërt në klasifikim.
Për Atletikon nuk qe një mbrëmje e mbarë, ashtu siç ka ndodhur shpesh gjatë tërë këtij sezoni. Veç humbjes, skuadra e Simeone-s mbeti dhe pa portierin Oblak, i nxjerrë nga loja i dëmtuar nga fundi i pjesës së parë. Në vend të gjashtë, 12 pikë larg Realit kryesues, titulli kampion duket që tani një objektiv i pamundur.
Në kampionatin italian, kanë qenë dy ndeshjet e luajtura të hënën. Fiorentina do të fitonte fillimisht 2-1 ndaj Sasuolos, për t’ia lënë vendin më pas takimit të fundit të javës së 16-të, atij të luajtur për vendin e dytë.
Roma dhe Milani erdhën në këtë ndeshje me pikë të barabarta, si të vetmit ndjekës të afërt të Juventusit. Në një takim të ekuilibruar, mundësinë më të mirë për të kaluar në avantazh e patën së pari udhëtuesit.
Niang gaboi nga pika e 11-metërshit në minutën e 27; ky qe rasti më i mirë për Milanin gjatë gjithë
ndeshjes.
Roma e shtoi presionin në pjesën e dytë, kur dhe e gjeti golin e fitores. Nainggolan shënoi në minutën e 62-të.
Pa forcën e duhur, edhe pse nuk i mungoi dëshira, Milani nuk bëri dot asgjë për t’i ndryshuar shifrat. Në fund, Roma fitoi 1-0 dhe u çlirua nga dublimi i Milanit në klasifikimin e Serisë A.
Me 35 pikë, Roma mbetet në vend të dytë, katër pikë larg Juventusit në kryesim. Milani qëndron në kuotën e 32 pikëve, por me Napolin tani shumë pranë, që ka vetëm një pikë më pak. /tesheshi.com/
