Në Kosovë nisi vendosja e afisheve në automjetet e regjistruara dhe të siguruara.
Vlerësimet tregojnë se aktualisht në Kosovë ka pothuajse 200 mijë automjete të paregjistruara, andaj qëllimi i këtij projekti është që të ndihmojë Policinë e Kosovës të identifikojë nëse automjetet në komunikacion janë të regjistruara, pa pasur nevojë për ndalimin e tyre.
Ngjitëset do të jenë të dallueshme nga ngjyrat për një vit të caktuar dhe do të tregohet një datë në mënyrë që policia të dijë se kur skadon regjistrimi i tyre.
Zëvendësministri i Mjedisit, Planifikimit Hapësinor dhe Infrastrukturës, Hysen Durmishi tha se zbatimi i projektit do t’i hapte rrugën Kosovës për t’u anëtarësuar në Kartonin e Gjelbër të Sigurimit.
Falas
Durmishi po ashtu theksoi se afishet do të jenë pa pagesë, ndërsa shpenzimet do mbulohen nga anëtarët e Byrosë Kosovare të Sigurimeve.
“Është një hap shumë i rëndësishëm, një hap shumë i madh me të vetmin qëllim që përmes këtij projekti të zvogëlohet numri i automjeteve të paregjistruara në Kosovë, që është një pengesë jashtëzakonisht e madhe për anëtarësim në Kartonin e Gjelbër”, tha Durimishi.
Guvernatori i Bankës Qendrore të Kosovës, Fehmi Mehmeti tha se kompanitë e sigurimeve e kanë mbështetur projektin.
“Mbi të gjitha është në interes që të zvogëlohen aksidentet me fatalitet, të cilat kryesisht shkaktohen nga automjtetet e pasiguruara”, tha Mehmeti, duke shtuar se BQK-ja do të vazhdojë të mbështesë projekte të tilla.
Policia në vendet e tjera evropiane gjithashtu do të ketë qasje në të dhënat e afisheve kur automjetet e regjistruara në Kosovë të shkojnë jashtë vendit. /tesheshi.com/
