Nga Blendi Gashi
Pesëmbëdhjetë vjet pas lufte dhe shtatë pas pavarësimit të vendit, asnjë nga qeveritë e Kosovës nuk e ka nxjerrë në planin legjislativ hartimin e një ligjit për referendume.
Kjo në një kohë që, padyshim, Kushtetuta e Kosovës e njeh të drejtën për referendum që prej hartimit të saj.
Neni 2 i Kushtetutës thotë se Populli ushtron të drejtën për sovranitet përmes përfaqësuesve të zgjedhun dhe referendumit.
Në nenin 65, pika 3, Kushtetuta ia jep të drejtën me shpall referendumin Kuvendit të Kosovës.
Dhe në mungesë të këtij ligji, po anashkalohet vullneti qytetar i garantuar me Kushtetutë në procesin vendimmarrës, për tema të ndjeshme, si këto të fundit, marrëveshjet në Bruksel dhe demarkacionin me Malin e Zi.
Deputetë të Kuvendit thonë se do ishte i dobishëm për vendin një ligj për referendume, pra vetë zhvillimi i referendumeve, pasi do të zgjidheshin disa çështje të brendshme për të cilat partitë politike nuk arrijnë dhe nuk do të arrinin pajtim. Opozita thotë se qeveria tash e disa vite nuk po mund ta bëj ligjin për Prishtinën e lëre më ligjin mbi referendumet.
Deuteti i LDK-së, Adem Salihaj, ka deklaruar se referendumet janë karakteristikë e vendeve me demokraci të zhvilluar, kurse në vendet të cilat janë në tranzicion apo nuk kane demokraci të zhvilluar, si Kosova, zakonisht nuk e praktikojnë referendumin.
“Në fakt, do të ishte mirë që edhe Kosova ta ketë një ligj për referendumin, sado që vështirë se do të mund ta zbatonte, duke marrë parasysh se shumë vendime detyrohet t’i marrë, pavarësisht faktit se qyretarët nuk pajtohen me to. Është e dobishme për Kosovën ta ketë një ligj të tillë, sepse së paku do t’i zgjidhte shumë çështje të brendshme, të cilat nuk kanë implikime ndërkombëtare, për të cilat nuk arrijnë pajtim partitë politike. Në këtë rast, referendumi do ta zgjidhte problemin”, ka deklaruar Salihaj.
Muharrem Nitaj, zëdhënës i AAK-së, nuk shprehet i habitur pse ligji për referendumin nuk është miratuar nga asnjë Qeveri, duke thënë se nuk janë miratuar ligje edhe më të rëndësishme.
“Ligji për referendumin është një çështje me vete. Qeveria tash e sa vjet nuk po mundet ta bëjë Ligjin për kryeqytetin, e ju po pyesni për ligjin mbi referendumin. Qeveria e ka lënë të cunguar Gjykatën Kushtetuese dhe me vite nuk po mundet me u dakordu për zgjedhjen edhe të dy gjyqëtarëve, e jo më t’i bie ndërmend ligji për referendumin. Me fajin e pushtetit politik sot Kosova me mbi 90 për qind shqiptarë, ka një Gjykatë Kushtetuese, ku prej 9 gjyqëtarëve, vetëm dy janë shqiptar. Në këtë vend, asgjë nuk është normale, por në rastin konkret, më duhet të them se referendumi nuk është pengesa”, ka deklaruar Nitaj për ‘Te Sheshi’.
Analisti politik, Blerim Burjani, ka thënë për “Te Sheshi”, se deri më tani nuk ka pasur iniciativë për ligjin për referendumin për shkak të pakicës serbe e cila ëndërron organizimin e një referendum për komunat serbe dhe ruajtjes së rendit juridik. “Është mjaft e çuditshme pse edhe pas 7 viteve Kosova nuk ka ende ligj të tillë, madje s’ka as iniciativë qeveritare e as parlamentare për të draftuar dhe miratuar një ligj të tillë”, ka deklaruar Burjani.
Ndryshe, po bëhen afër 8 vite që nga ratifikimi i Kushtetutës dhe Kuvendi i Kosovës ende nuk ka miratuar një ligj për referendumin. /tesheshi.com/
