Nga Blendi Gashi
16 vjet pas luftës, fshati Kijevë i Komunës së Malishevës është bërë me stacion policor.
Ajo do shërbejë si një pikë e kontaktit polici-qytetar, më e veçanta në Kosovë. Por e veçanta tjetër është se kjo pikë kontakti, e vendosur në një zyrë të improvoizuar njëdhomëshe, gjendet ballë për ballë vendit ku para dhe gjatë luftës ka qenë i vendosur stacioni famkeq i policisë serbe, në të cilin janë rrahur e keqtrajtuar shumë shqiptarë nga të gjitha vendet e Kosovës. 
Edhe pse nuk është ndonjë ndërtesë dy katëshe siç ishte stacioni policor serb paralfute, por veç një barakë e vogël e vendosur pranë rrugës kryesore të fshatit dhe oborrit të shkollës së mesme ‘Lasgush Poradeci’, një gjë dihet, nuk do të jetë stacion i frikës, maltretimeve, por një zyrë policie ku banorët e Kijevës dhe fshatrave përreth do të kërkojnë ndihmë për çdo lloj pasigurie që mund t’iu paraqitet.
Me vendosjen e kësaj pike të policisë, kijevasit njëherë e përgjithmonë do të harrojnë stacionin e mallkuar serb, ndërtestën dy katëshe e cila është rrënuar menjëherë paslufte, në të cilin vend tani e ca kohë është ndërtuar një ndërtesë e lartë, e llojit të qendrës tregtare.
Hapja e kësaj pike, kërkesë e banorëve
Nënkryetari i Komunës së Malishevës,Rexhep Mazreku, me rastin e hapjes së kësaj zyre të kontaktit të policisë, ka thënë se bashkëpunimi qytetar-polici duhet të rritet edhe më shumë, pasi tani jetojmë në kushte dhe rrethana tjera, dhe për këtë duhet të krijohet një siguri e plotë për të gjithë qytetarët.
“Pasi Kijeva, është një qendër mjaft e frekuentuar, hapja e kësaj zyre të kontaktit ka qenë e nevojshme, që policia të jetë më afër qytetarëve”, tha ai.
Edhe komandanti i stacionit policor në Malishevë, kapiteni Halil Morina, tha se kjo zyre është hapur me qëllim që policia të jetë sa më afër dhe me qytetarin.
“Policia është Populli dhe Populli është Policia. Hapja e kësaj pike, ka qenë edhe kërkesë e banorëve të kësaj ane”, tha ai.
Paraprakisht, në Kijevë, është mbajtur edhe një takim i Komitetit Lokal për Sigurinë Publike (KLSP), ku kryetari i këtij komiteti, Maliq Kryeziu, e prezantoi ekipin e KLSP-së, qëllimin e formimit dhe misionin që ka ky këshill. Sipas Kryeziut, edhe hapja e zyrës kontaktuese të policisë, është realizimin i kërkesës së parë të KLSP-së, ndërsa ky komitet, do të vazhdoj me projekte tjera, në shërbim të komunitetit, me qëllim të sigurimit të një sigurie sa më të lartë.
Banorët janë shprehur të kënaqur me hapjen e kësaj pike të policisë pasi kanë thënë se në vitet e fundit janë shtuar dukshëm rastet e vjedhjeve. /tesheshi.com/
