Një takim i zhvilluar të dielën në Bruksel mes udhëheqësve të një numri shtetesh të Bashkimit Europian dhe atyre të Ballkanit, posaçërisht Shqipërisë, Serbisë dhe Maqedonisë, ka përfunduar me një dakortësi mbi një plan prej 17 pikash që synon t’u japë zgjidhje një pjese të problemeve të lindura nga vala e refugjatëve.
Presidenti i Komisionit Europian, Jean-Claude Juncker, si organizuesi i këtij takimi, është shprehur, “Ramë dakort për një plan 17-pikësh të masave operacionale për t’i siguruar njerëzit se nuk do të lihen të mbahen vetë.”
Në pikat kryesore të marrëveshjes është angazhimi i Greqisë për të rritur kapacitetin e saj pritës me 30.000 vende të tjera. Në përputhje me planin, UNHCR-ja, agjencia e OKB-së për refugjatët, ka për të ndihmuar në bërjen të mundur të pranimit të 50.000 azilkërkuesve të tjerë përgjatë kalimit në rrugët e Ballkanit.
Juncker deklaroi në një konferencë shtypi të dielën vonë se kapacitetet pritëse në Greqi dhe në vendet e tjera të Ballkanit Perëndimor do të rriten me 100.000 vende. “Vendet e prekura nuk duhet të flasin vetëm për njëri-tjetrin, por dhe me njëri-tjetrin. Fqinjët duhet të punojnë së bashku, jo kundër njëri-tjetrit,” theksoi Juncker, duke kërkuar një rritje të bashkëpunimit midis vendeve në rajon.
Mes vendimeve është dhe ai për të dislokuar brenda javës 400 punonjës policie në Slloveni, për t’i ardhur në ndihmë vendit që po përballet aktualisht me valën e refugjatëve. /tesheshi.com/
