Bashkimi Evropian ka aprovuar një plan nga shtatë shtete anëtare për të subvencionuar zhvillimin e industrisë së baterive elektrike, ku do të hidhen 3.2 miliardë euro në një përpjekje për të frenuar mbizotërimin e Kinës në këtë fushë.
Brukseli Zyrtar thotë se plani i subvencioneve, i financuar nga Belgjika, Finlanda, Franca, Gjermania, Italia, Polonia dhe Suedia, do të mbështesë kërkimin dhe inovacionin në këtë sektor kyç, ku Evropa mbetet pas konkurrencës së saj aziatike dhe mbështetet shumë tek importi.
Sipas BE-së, ky financim nga vendet anëtare duhet të inkurajojë mobilizimin e pesë miliardë eurove shtesë në investime private.
“Prodhimi i baterive në Evropë është me interes strategjik për ekonominë dhe shoqërinë tonë, për shkak të potencialit të tij përsa i përket energjisë së pastër, krijimit të vendeve të punës, qëndrueshmërisë dhe konkurrencës,” tha Margrethe Vestager, Komisionerja Evropiane për Politikën e Konkurrencës.
“Ndihma e aprovuar do të sigurojë që ky projekt i rëndësishëm mund të ecë përpara pa shtrembëruar konkurrencën padrejtësisht.”
Komisioni Evropian tha që paratë e shtetit do të kanalizohen në 17 ndërmarrje të ndryshme, duke mbuluar tërë zinxhirin e prodhimit, nga nxjerrja e mineraleve deri në prodhimin dhe riciklimin e baterive.
Presidentja e re e KE, Ursula Von der Leyen ka bërë ndryshimin e klimës një nga përparësitë e saj, dhe zhvillimi i baterive të automjeteve elektrike përshtatet në planin e saj për të ulur emetimet e karbonit në BE të paktën 50 përqind deri në 2030, nivele nga vitet 1990.
Franca ka njoftuar se, në partneritet me Gjermaninë, ajo do të financojë punën në kërkimin dhe zhvillimin e baterive litium-jon nga grupi automobilistik Peugeot-Citroen dhe ndërmarrja prodhuese e baterive Saft, me dy fabrika që po ndërtohen në të dy vendet. /tesheshi.com/
