Ndotja e ajrit vret 13 njerëz çdo minutë dhe shumë prej këtyre vdekjeve regjistrohen në qytete në mbarë botën. Megjithatë, ndërsa qytetarët e Ballkanit janë ende në pritje të zgjidhjeve konkrete, shumë qytete në mbarë botën kanë marrë masa për dekada të tëra për të ulur ndotjen dhe për të përmirësuar cilësinë e jetës.
Kina, për shembull, ka arritur sukses të jashtëzakonshëm në uljen e ndotjes në kryeqytetin, Pekin. Që nga viti 2013, ndotja e ajrit është ulur me 64 për qind, ndërsa gazrat e dëmshëm si dioksidi i azotit janë reduktuar me 54 për qind dhe dioksidi i squfurit me 89 për qind.
Këto ndryshime mbresëlënëse u arritën duke reduktuar konsumin e qymyrit, duke mbyllur fabrikat ndotëse dhe duke përmirësuar sistemet e ngrohjes, ndërsa qyteti vazhdoi të përparonte ekonomikisht.
Qytetet evropiane nuk ishin shumë prapa. Në vitin 2013, Talini u bë qyteti i parë evropian që u ofron banorëve të tij transport publik falas, në mënyrë që të reduktojë bllokimet e trafikut dhe ndotjen. Ky shembull u pasua nga Luksemburgu, Malta, Montpellier, madje edhe qytete si Slavonski Brod.
Londra prezantoi ligje që ndalonin përdorimin e qymyrit në industri dhe familje edhe më herët, dhe masat e prezantuara në 2019 çuan në një reduktim drastik të ndotjes. Automjetet që nuk plotësojnë standardet mjedisore tani paguajnë një tarifë ditore për të hyrë në zonën e mbrojtur qendrore dhe rezultatet janë mbresëlënëse: nivelet e dioksidit të azotit janë ulur me 53 për qind në qendër të Londrës dhe 21 për qind jashtë saj, shkruan TRT Balkan BHSC.
Për qytete si Nju Delhi dhe Pekini, situata është edhe më serioze. Qytetarët pajisen me maska falas në periudhat e ndotjes së lartë të ajrit.
Ndërkohë që qytetet e botës po ndërmarrin hapa konkretë, pyetja është nëse vendet e Ballkanit do të ndërmarrin së shpejti masa të ngjashme për të përmirësuar cilësinë e jetës së qytetarëve të tyre dhe për të ulur vdekshmërinë e shkaktuar nga ndotja.
Është koha për të vepruar, pasi sepse ka zgjidhje për ndotjen e ajrit, shkruajnë disa media rajonale.
Ndër qytetet më të ndotura, për shkak të lëndës me të cilën ngrohen, janë Sarajeva, Shkupi, Tetova e Prishtina. /tesheshi.com/
