Mensur Krasniqi
Me 83 vota pro dhe 3 kundër shtyhet vendimi për shpërbërjen e kuvendit në Maqedoni. Me këtë paralelisht është votuar edhe ndryshimi i Kodit Zgjedhor, që zgjedhjet e parakohshme parlamentare të mos mbahen më 24 prill, ashtu siç ishte paraparë me Marrëveshjen e Përzhinos, por më datë 5 qershor.
Në prononcimin e tij në mesnatë, ambasadori amerikan në vend, Jess Baily, tha se vendimi për shtyrjen e zgjedhjeve për më 5 qershor ishte vendim i mirë. Ai shtoi se partitë duhet t’u mbahen rregullave në mënyrë që të kemi zgjedhje të besueshme.
“Nëse secili punon shumë dhe i përmbahet rregullave, besojmë se zgjedhjet e 5 qershorit do të jenë të besueshme dhe do ta çojnë vendin përpara. Ne besojmë se të gjitha partitë politike duhet të marrin pjesë në procesin zgjedhor”, tha mes tjerash Baily, duke shtuar se reformat e mediave mbeten pjesë e rëndësishme, jo vetëm e procesit zgjedhor, por edhe e reformave të kërkuara nga BE-ja.
Pas marrjes së vendimit për caktimin e datës së re të zgjedhjeve për dallim prej liderëve politik shqiptar, Ali Ahmetit dhe Menduh Thaqit, të cilët nuk ndaluan për të dhënë qëndrimet e tyre, liderët politik maqedonas mbajtën konferencën për shtyp.
Në fillim të fjalimit të tij, kreu i VMRO-DPMNE-së, Nikolla Gruevski ka thënë se ka marrë garanci nga kreu i BDI-së, Ali Ahmeti, se më 5 qershor ata do të dalin në zgjedhje, me ose pa LSDM-në, dhe se nuk do ketë shtyrje tjera të zgjedhjeve.
“E dëgjova Zaevin duke thënë se asgjë më nuk varet nga Gruevski dhe për këtë shkak i them: Hajde Zaev ballafaqohu me popullin në vend që të rrethohesh me njerëz që të duartrokasin se janë shtyrë zgjedhjet për një muaj”, tha mes tjerash Gruevski.
Ai gjithashtu tha se secili i ka të qarta arsyet se pse LSDM-ja nuk dëshiron zgjedhje, ashtu siç i ka të qarta arsyet se pse faktori ndërkombëtarë vlerësoi ashtu siç vlerësoi.
“Vendimi për datën e zgjedhjeve ishte në dorën tonë. Pas shumë analizave, Komiteti Ekzekutiv i VMRO DPMNE-së vendosi shtyrjen e zgjedhjeve nga 24 prill në 5 qershor, jo për të kënaqur LSDM-në, sepse ata sidoqoftë, do të iknin prej zgjedhjeve”, tha mes tjerash Gruevski.
Ai sqaroi se përfaqësuesit e SHBA-ve dhe BE-së e kanë bindur për 4 gjëra: e para, se kjo është shtyrja e parë, e dyta, deri në zgjedhjet e qershorit nuk do të ketë bisedime të ndryshme për zgjedhjet, se edhe ata tani e dinë se KSHZ mund ta pastrojë listën, e treta, se nuk do të ketë kushte të reja për zgjedhjet e qershorit, siç është çështja e mediave dhe e katërta, se nuk do të ketë vlerësim të ri për shtyrjen e zgjedhjeve.
Nga ana tjetër kreu i LSDM-së, Zoran Zaev në konferencë të jashtëzakonshme nga selia e partisë ka deklaruar që vendimi për anulimin e shpërbërjes së Kuvendit është edhe një disfatë për Nikolla Gruevskin, ku pas gjitha gënjeshtrave dhe inatosjeve me ditë fshehje nga opinioni ai pranoi përgjegjësinë e tij personale se nuk ka kushte për zgjedhje të drejta dhe demokratike.
“Gruevski dëshiroi ta fusë Maqedoninë në një izolim të thellë ndërkombëtar. Me të vetmin qëllim shpëtimin e tij. Gruevski nuk mund ta mbaj peng Maqedoninë. Vetëm një orë më parë ata thonin se nuk lëvizin nga data 24 prill. Asgjë nuk varet nga Gruevski, ai është e kaluara për Maqedoninë. Në Maqedoni do të ketë zgjedhje ku të gjitha partitë do të marrin pjesë në zgjedhje të drejta dhe demokratike. Ndryshimet vijnë në zgjedhje të lira në të cilat do të fitojnë qytetarët”, tha Zaev.
Derisa në faqen zyrtare të liderit të BDI-së, Ali Ahmeti në rrjetin social Facebook është postuar ky qëndrim lidhur me datën e re të zgjedhjeve:
“Të dashur qytetar, bashkëpartiak, përkrahës, simpatizantë e aktivistë,po afrohet 5 qershori, një datë e shënuar për të gjithë ne, dita e themelimit tē Bashkimit Demokratik për Integrim si subjekt pasardhës dhe trashëgues i Ushtrisë Çlirimitare Kombëtare.
Në këto 14 vite gjithmonë qëndruam bashkë dhe u ballafaquam me sukses më të gjitha sfidat para nesh si dhe arritëm shumë në të gjitha sferat e jetës shoqërore, por njëkohësisht mbetet edhe shumë punë para nesh të cilën përsëri do ta realizojmë bashkë.
Ky përvjetor i joni më 5 qershor do të jetë i veçantë sepse vjen në rrethana shumë sfiduese, prandaj ju ftoj të gjithë juve që të na gjej të pregatitur dhe të bashkuar për ta vijuar rrugën dhe misionin tonë”. /tesheshi.com/
