Deklarata e ambasadës së SHBA-së në Tiranë pas raportit të DASH-it ishte si një “dush i përvëluar” për politikën shqiptare, e cila nëse lexohet me kujdes, kryefjalë ka fjalën “ndryshim”.
Në fakt ka prej javësh, që në qarqet diplomatike shqiptare flitet për një operacion të fortë që Edi Rama si kreu i mazhorancës do të ndërmarrë me nisjen e reformës në drejtësi.
Një operacion që si bazë ka rikonfigurimin e kabinetit qeveritar, por gjithçka ka ngecur në dikasterin e drejtësisë. Siç mësohet, ndërkombëtarët kanë kërkuar që përpara të ashtuquajturës reformë të sistemit gjyqësor, do të duhet që qeveria të nisë një rikonfigurim nga e para të sistemit të hipotekave dhe të pronave në vend, i cili do të sillte një besim të publikut tek institucionet që ai ka punë në mënyrë direkte.
Ndërkaq siç mësohet, në muajin shtator qeveria do të ketë emra të rinj në tre nga dikasterët bazë, duke nisur nga Drejtësia, Zhvillimi Urban dhe ndoshta edhe Financat. Madje ditët e fundit është folur për një rrokadë të fuqishme PS-LSI ndërmjet Drejtësisë dhe Financave. Pra Ministrinë e Drejtësisë mund ta marrë një eksponent i Partisë Socialiste dhe Ministrinë e Financave të marrë një njeri i Lëvizjes Socialiste.
Një burim diplomatik i tha tesheshi.com, se LSI-ja ka përgatitur si propozim për Ministër Financash, një ekspert mjaft të mirë dhe politikan të panjollosur, por që ka mjaft ngjashmëri me ministrin aktual, Shkëlqim Cani. Siç mësohet edhe kandidati i mundshëm për këtë post i përket qarkut të Dibrës dhe është një ekspert që e njeh shumë mirë sektorin bankar, pasi ka menaxhuar institucione shumë të fuqishme financiare në vend.
Ndërkaq nga sektorët e tjerë, qeveria nuk do të pësojë tronditje të mëdha, por nuk përjashtohet mundësia për një prekje të disa dikastereve. Por i gjithë sistemi piramidal i ministrisë së Drejtësisë, që nga hipotekat dhe inspektimeve do të pësojë një ndryshim radikal, ashtu si dhe gjyqësori. /tesheshi.com/
