Nis shpërndarja e ndihmave për familjet e zonave të përmbytura nga reshjet e ditëve të fundit. Strukturat e Emergjencave Civile dhe të Rezervave të Shtetit kanë ofruar ndihma ushqimore dhe batanije, për banorët e Njësisë Administrative 11 të Tiranës. Në këtë aksion i pranishëm ishte edhe ministri i Punëve të Brendshme, Saimir Tahiri, i shoqëruar nga prefekti Sadi Vorpsi dhe deputeti Rakip Suli. Tahiri apeloi për solidaritet të gjithë shoqërisë. “Kjo për shkak se zona ku jemi është një zonë që në mënyrë ciklike përmbytet. Dhe ndërkohë na duhet të marrim masa emergjente për të garantuar që kjo të mos ndodhë më në të ardhmen. i kemi bërë thirrje sipërmarrësve, i kemi bërë thirrje të gjitha institucioneve shtetërore dhe fillojmë sot një fushatë solidariteti dhe ndihme për të gjithë ata që kanë pasur probleme për shkak të motit dhe situatave të vështira për shkak të motit”, u shpreh ministri.
Tahiri tha se vendi është i kërcënur nga rreziku për tu përshkallëzuar situata e përmbytjeve. “Situata është ende në vlerësim të vazhdueshëm orë pas ora, pasi reshjet e shiut nuk kanë pushuar. Ka zona të vendit me temperaturë të lartë – pra nga pikëpamja e rrezikut janë ende nën kërcënimin e motit. Ne po e monitorojmë çast pas çasti, në mënyrë që të shmangim sa është e mundur pasojat e rënda në pasurinë e qytetarëve dhe mbi të gjitha për të shmangur në mënyrë absolute pasojat në shëndetin dhe jetën e qytetarëve”, tha ai.
I pyetur për “blindimin” e shumë zonave në Tiranë dhe Elbasan sa i takon ndeshjes me izraelin, ministri i Brendshme ju shmang përgjigjes, duke ju referuar situatës së krijuar nga moti i keq. “Policia ka marrë të gjitha masat. Unë sot këtu jam për tjetër gjë dhe do të doja të mos zgjatesha në çështje të tjera. Më mirëkuptoni, për mua është shumë e rëndësishme që t’i tregojmë publikut aftësinë që kemi si shoqëri për t’u bërë bashkë dhe për të ndihmuar ata që janë në nevojë”, përfundon Tahiri./tesheshi.com
