Stadiumi “Elbasan Arena” pas tre javësh për ndeshjen me Serbinë do të jetë i mbushur me agjentë sekretë, punonjës institucionesh dhe policë.
Siç mësohet nga burime pranë Federatës Shqiptare të Futbollit në përballjen me Serbinë ka gjasa të mungojnë fare grupimet e rëndësishme të tifozave si “Plisat” “Ballistat” e të tjerë, ndërkohë mund të ketë vetëm një përfaqësi të paracaktuar ultrash që do të qëndrojnë vetëm pas porte.
Sekretari i Përgjithshëm, i Federatës Shqiptare të Futbollit, Ilir Shulku, deklaroi se masat e sigurisë do të jenë shumë të rrepta për këtë ndeshje, pasi ndeshjen e kaluar me Portugalinë, ishit dëshmitarë të risisë sonë me bileta të personalizuara. Kjo do të thotë se ka qenë një stadium i monitoruar plotësisht. Këtë radhë, në bashkëpunim me Policinë e Shtetit do të jetë shumë më i rreptë kontrolli. Ne do të kërkojmë që në stadium të vijnë tifozë, të cilët do të jenë aty vetëm për të përkrahur kombëtaren shqiptare”.
Në lidhje me biletat, Shulku theksoi se “shitja e biletave do të bëhet në bashkëpunim me Policinë e Shtetit, me organe shumë të specializuara, kështu që mendoj se gjatë kësaj jave – ndoshta edhe nga sot që po flasim, – do të fillojë shitja e tyre online. Në të njëjtën kohë do të fillojë edhe shitja e biletave për institucionet zyrtare e kështu me radhë”. /tesheshi.com/
