Vijojnë akuzat e Partisë Demokratike kundër projektit të ri për ndërtimin e stadiumit “Qemal Stafa” në Tiranë. Këtë herë ka qenë kreu i Rendit dhe Sigurisë në PD, Enkeled Alibeja, ai që ka deklaruar se Edi Rama ka planifikuar që një truall të rëndësishëm në Tiranë, aneksin e Stadiumit Qemal Stafa ta vërë në dispozicion të një bande tjetër kriminale.
“Më parë, kur bashkia drejtohej nga z. Basha, kjo zonë ishte parashikuar të bëhej lulishte, me kënd lojërash për fëmijët në shërbim të komunitetit. Por Edi Rama e ka fshirë këtë projekt, dhe ka në plan që t’ia japë bandës tjetër të preferuar, për të ngritur selinë e saj qendrore”, – tha Alibeaj.
Ai kujtoi edhe një herë se banda e Shullazit me Edi Ramën mori pronën dhe truallin më të çmuar në mes të Durrësit, godinën historike të hotel Vollgës.
“Tashmë, Edi Rama po planifikon të shërbejë Shullazin dhe një bandë tjetër, lidhjet me të cilën janë të vjetra për të, qysh se u bë për herë të parë kryetar bashkie, me këtë truall në qendër të Tiranës”, – tha në deklaratën e tij për media kreu i Rendit dhe sigurisë në PD. /tesheshi.com/
