Nga terreni, në Siri, ka patur raportime për përplasje të izoluara, por në tërësi në tërë vendin ka mbizotëruar qetësia.
Observatori Sirian për të Drejtat e Njeriut flet për një atmosferë qetësie në provincat e mëdha të Sirisë në orët e para të armëpushimit të arritur me ndërmjetësimin e Rusisë dhe Turqisë.
Megjithatë, sipas Observatorit, në Hama ka patur luftime sporadike midis kryengritësve dhe forcave qeveritare.
“Përplasje të ashpra pati mes dy palëve, që i bënë forcat e regjimit të tërhiqen nga një kodër pranë Mahardës,” i ka thënë agjencisë së lajmeve AFP drejtuesi i këtij organizmi.
Armëpushimi në tërë Sirinë vjen vetëm një javë pasi forcat qeveritare morën në dorë tërësisht kontrollin e Halepit.
Turqia dhe Rusia ndërmjetësuan po ashtu evakuimin e mijëra civilëve dhe kryengritësve nga Halepi. I dërguari i OKB-së për Sirinë, Staffan de Mistura, u shpreh se shpresonte që marrëveshja e armëpushimit do të hapte rrugën për bisedime produktive në Kazakistan.
Siç nënvizon Al Jazeera, armëpushimi është iniciativa e parë e madhe diplomatike ndërkombëtare në Lindjen e Mesme përgjatë shumë dekadave që nuk e përfshin SHBA-në. /tesheshi.com/
