Administrata ushtarake e Çadit ka nënshkruar një marrëveshje me më shumë se 40 grupe opozitare për të nisur bisedimet kombëtare të paqes, por grupi kryesor rebel nga vendi i Afrikës qendrore refuzon të jetë pjesë e bisedimeve.
Sipas marrëveshjes, të nënshkruar të hënën në kryeqytetin e Katarit, Doha, bisedimet, të cilat duhet të hapin rrugën për zgjedhjet presidenciale, janë planifikuar të fillojnë më 20 gusht.
Që nga marsi, Katari ka ndërmjetësuar midis grupeve opozitare dhe administratës ushtarake të Çadit të udhëhequr nga Mahamat Idriss Deby Itno, një gjeneral që mori pushtetin pasi babai i tij u vra duke luftuar kundër rebelëve vitin e kaluar.
Por Fronti për Ndryshim dhe Marrëveshje në Çad (FACT), grupi kryesor rebel, ka njoftuar se nuk do ta nënshkruajë marrëveshjen pavarësisht përpjekjeve të ndërmjetësuesve të Katarit.
Në një deklaratë të lëshuar në Doha përpara nënshkrimit të marrëveshjes, FACT tha se “refuzon marrëveshjen që do të nënshkruhet”. Shtohet se pjesëmarrësit e dialogut kombëtar nuk do të trajtohen në mënyrë të barabartë dhe kërkohet një komision i ri për organizimin e negociatave, si dhe lirimin e rebelëve të burgosur nga burgjet shtetërore.
“Megjithatë, FACT mbetet i disponueshëm për dialog kudo dhe në çdo kohë,” shtoi në një deklaratë grupi, i cili vlerësohet të ketë midis 1.500 dhe 2.000 luftëtarë.
Ishin luftëtarët e FAKT-it ata që udhëhoqën ofensivën në të cilën u vra Idriss Deby Itno, i cili është babai i Debit dhe që ishte president për 30 vjet. /tesheshi.com/
