Qeveria suedeze, e shqetësuar tej mase për numrin e lartë të refugjatëve që mbërrijnë në vend, ka nisur të zbatojë prej mesnatës të së dielës kontrollin në kufi të kartave të identitetit. Kjo është një prej masave në përpjekje për t’i vënë fre valës së pafundme të refugjatëve.
Ndërsa në vitin e shkuar arritën më shumë se 160.000 azilkërkues, përgjithësisht nga Siria, Iraku dhe Afganistani, autoritetet suedeze kanë ngritur duart, duke deklaruar se nuk mund t’i bëjnë më ballë numrit rekord të refugjatëve.
Sipas rregullave të reja, kushdo që hyn në Suedi me autobus, tren apo traget, nga Danimarka do të kontrollohet, e ai që nuk posedon një kartë identiteti të vlefshme do të kthehet nga ka ardhur.
Siç njofton Agjencia Suedeze e Migracionit, 80 për qind e atyre që kërkuan azil në Suedi në 2015-ën ishin pa pasaporta apo pa karta identiteti në momentin e plotësimit të dokumentacionit përkatës.
Shenjat për nisjen e kontrollit të kartave të identitetit qenë dhënë që në dhjetor, kur ministri i Drejtësisë dhe Migracionit, Morgan Johansson, pati deklaruar, “Ne duhet ta ulim numrin e azilkërkuesve, dhe kontrolli i kartave të identitetit është një mënyrë për ta arritur këtë.”
Suedia ndjek me këtë masë shembullin e disa vendeve të tjera europiane, që po ashtu kanë nisur kontrollet e imtësishme në kufi të mjeteve të identifikimit të të ardhurve. /tesheshi.com/
