Nga Ylli Pata
NATO do të zhvillojë në muajin e ardhshëm një manovër të madhe detare në ujrat e Shqipërisë dhe Malit të Zi.
Përveç një aeroplambajtëseje, në Adriatik pritet të dislokohen edhe 3 luftanije amerikane dhe një italiane, të cilat do të simulojnë stërvitje, kryesisht të tipit desantim dhe ndërhyrje në zona rreziku të forcave speciale në terrene të përcaktuara tokësore.
Manovra ka të bëjë me programin e përbashkët të luftës ndaj trafiqeve dhe terrorizmit, por edhe të mbrojtjes së vendeve anëtare të NATO-s nga ndonjë rrezik i mundshëm.
Manovra zhvillohet pak pas samitit të Podgoricës, ku mori pjesë edhe Zv.presidenti amerikan, Mike Pence.
Stërvitja ka si thelb të saj lidhjen e koordonit mbrojtjes të NATO-s nga Deri i Zi në Adriatik, që është edhe pjesë e kufirit të ri të NATO-s karshi Rusisë.
Kërcënimet ruse për Ukrainën dhe vendet balltike, kanë detyruar Aleancën e Atlantikut të Veriut që të sigurojnë një “kordon sanitar” nga Balltiku në veri, e deri në Gjeorgji, pra në jugun e Detit të Zi.
Në stërvitje detare do të marrin pjesë trupa të Flotës Detare shqiptare, asaj kroate dhe të Malit të Zi. Ndërkaq, një njësi helikopterësh e ushtrisë së Maqedonisë do të jetë pjesë e trupave mbështetëse në tokë, kryesisht të mjekësisë ushtarake apo të logjistikës.
Një ekip i Ministrisë së Mbrojtjes të Serbisë do të jetë në manovra në statusin e vëzhguesit pa marrë pjesë direkt në manovra.
Në një farë mënyre, ky demonstrim i NATO-s në Ballkan është një veprim konkret pas lëvizjeve ruse për të shtrirë influencën në rajon.
Pas instalimit të qeverisë së re të Maqedonisë, mbylljen e zgjedhjeve në Shqipëri dhe zgjedhjes së Aleksandër Vuçiçit si president i Serbisë, është zbehur aksioni i Moskës në rajon, i cili deri në pranverë arriti sa të tentonte një grusht shteti në Maqedoni, me ndërhyrjen e shërbimeve sekrete ruse e serbe, të cilat tashmë janë vërtetuar se kishin dorë në trazirat e prillit, ku u masakrua kryeministri Zoran Zaev, deputeti shqiptar Zijadin Sela, ministrja aktuale e Mbrotjes Sheqerinska, por edhe deputetë të tjerë të mazhorancës aktuale.
Stërvitja që do të zhvillohet muajin e ardhshëm në Adriatik do të jetë më e vogël se ajo që u zhvillua në fillim të korrikut në Detin e Zi, ku mori pjesë e gjithë Flota e Gjashtë amerikane e Mesdheut. /tesheshi.com/
