Gjashtë sulme terroriste në Paris që kanë sjellë deri tani rreth 120 të vdekur dhe mbi 250 të plagosur sipas autoriteteve.
Një natë terrori ajo në kryeqytetin francez, ku sipas të dhënave që vijnë nga mediat e vendit ISIS ka ndërmarrë disa sulme rresht për të ndikuar tërheqjen e Francës nga sulmet ajrore në Siri.
Sulmi më i madh ndodhi në sallën e koncerteve “Bataclan”, në qendër të qytetit ku u vranë rreth 70 persona, të cilët fillimisht u morën peng dhe më pas u ekzekutuan nga tre pengmarrësit. Forcat speciale të policisë bastisën sallën, duke ekzekutuar pengmarrësit, ndërsa liruan pengjet e mbetur.
Ndërkaq njerëz të armadosur nga brenda makinave kanë qëlluar nga jashtë dy restoranteve në ku mbetën të vdekur 11 persona, ndërsa pak më vonë ndodhën dy shpërthime pranë stadiumit “Stade de France”, ku po zhvillohej ndeshja miqësore mes Francës dhe Gjermanisë.
Policia franceze njoftoi se ka vënë në pranga 4 ekstremistë, të cilët dyshohet se kanë lidhje me sulmet.
Dëshmitarët thanë se pengmarrësit ishin të veshur jelekë antiplumb, ndërsa nuk ishin të maskuar. Sipas dëshmitarëve, ata qëlluan me kallashnikovë AK47, si dhe hodhën edhe granata. Sulmi në sallën e koncerteve ka zgjatur më shumë se 15 minuta.
Presidenti francez, Francois Hollande, i cili ishte duke parë ndeshjen miqësore France-Gjermani, është larguar për arsye sigurie nga stadium.
Më pas Hollande ka shpallur gjendjen e jashtëzakonshme përreth gjithë vendit dhe ka bllokuar kufijtë.
Në konferencën e shkurtër për shtyp, Presidenti Hollande u shpreh se “populli francez duhet të qëndrojë i bashkuar dhe i qetë, pavarësisht çfarë po ndodh”.
Pas sulmeve, ka reaguar përmes një konference për shtyp nga Shtëpia e Bardhë edhe Presidenti i Shteteve të Bashkuara Barack Obama.
Në fjalimin e tij, Obama u shpreh se “sulmet në Paris janë një përpjekje nga njerëz të egër për të terrorizuar civilë të pafajshëm. Shtetet e Bashkuara do të qëndrojnë përherë në krah të Francës në luftën kundër terrorizmit dhe ekstremizmit dhe do të bëjnë gjithçka mundet për të dërguar terroristët përpara drejtësisë”.
/tesheshi.com/
