Një operacion i gjerë ndërkombëtar kundër një rrjeti të strukturuar kriminal të trafikut të drogës është zhvilluar këtë të mërkurë nga autoritetet italiane në Bari, në bashkëpunim të ngushtë me institucionet shqiptare të drejtësisë dhe rendit. Për këtë arsye, operacioni është shtrirë gjatë natës dhe në aksin Tiranë-Durrës.
Në kuadër të këtij aksioni të përbashkët janë lëshuar 52 urdhër-arreste, si dhe janë urdhëruar sekuestrime të pasurive me vlerë disa miliona euro në të dy vendet. Këto masa godasin drejtpërdrejt bazën financiare të organizatës kriminale, e cila dyshohet për trafik të kokainës dhe heroinës në një itinerar që përshkonte Ballkanin, Puglian italiane dhe Evropën Veriore.
Sipas raportimeve nga mediat italiane, ndër të dyshuarit ka edhe punonjës policie dhe avokatë, të përfshirë në rrjetin kriminal, ndërsa në Shqipëri konfirmohen aktualisht dy arrestime në Vlorë dhe një në Fier.
Emrat e personave të përfshirë në këtë operacion të bujshëm janë:
Gertin Aliu
Adi Çoba
Ervis Deti
Agron Ganaj
Nuredin Kiptiu
Arsen Leskaj
Erigels Presi
Leonard Shakaj
Zenit Shtraza
Genci Telollari
Redi Tusha
Ervis Doçi (i njohur edhe si “Visi i Pojës”)
Ekil Nderjaku
Indrit Tafili
Operacioni është pjesë e një hetimi të përbashkët të koordinuar nga Drejtoria Antimafia e Barit, SPAK, Byroja Kombëtare e Hetimit (BKH), si dhe institucione të tjera si Eurojust, Interpol, dhe Policia e Shtetit.
Qëllimi i këtij hetimi afatgjatë është goditja e organizatave mafioze shqiptare të përfshira në trafikun ndërkombëtar të narkotikëve.
Deklarata nga SPAK
Një hap të rëndësishëm në luftën e përbashkët kundër krimit të organizuar, e cilësoi kreu i SPAK-ut Altin Dumani megaoperacionin e përbashkët italo-shqiptar në luftën kundër krimit të organizuar dhe drogës. Në konferencën e përbashkët për shtyp me homologët italianë, ai tha se është goditur një nga grupet më të fuqishme shqiptare të përfshirë në trafikun ndërkombëtar të drogave të forta dhe pastrimin e parave.
“Përfaqëson një hap të rëndësishëm në luftën e përbashkët kundër krimit të organizuar. Është arritur t’i jepet goditje e rëndësishme një prej grupeve kriminale më të fuqishme në Shqipëri që ka dyshime që ishte përfshirë në trafikun ndërkombëtar të drogave të forta dhe pastrimin e parave”.
Sipas tij, “ky operacion i mbështetur nga hetime të thelluara është dëshmi e qartë e saj që mund të arrihet kur institucionet e drejtësisë dhe strukturat e zbatimit të ligjit, bashkëpunojnë me besim të ndërsjellë me profesionalizëm dhe përkushtim”.
Pala itaiane
Prokurori i Barit, Roberto Rossi, vlerësoi bashkëpunimin me SPAK dhe autoritetet shqiptare për rezultatin e megaoperacionit ndërkombëtar antidrogë të zhvilluar këtë të mërkurë.
Në fjalën e tij në Tiranë, nga selia e Prokurorisë së Posaçme, Rossi tha se është shumë i lumtur për bashkëpunimin me palën shqiptare në luftën kundër mafies dhe trafikut të drogës.
“Kemi punuar dhe vazhdojmë punojmë prej dhjetë vitesh për arritjen e objektivave të përbashkët. Për ne, luftimi i krimit në Shqipëri apo Itali është e njëjta gjë dhe jemi plotësisht të ndërgjegjshëm që autoritet hetuese shqiptare dhe në veçanti SPAK, janë tepër të afta të ndjekin veprave penale bashkë me ne”.
Sipas tij, “mafia shqiptare për fat të keq ka një forcë ndërkombëtare shumë të madhe, por jemi të siguritë që populli shqiptar, me anë të prokurorisë dhe gjyqtarëve shqiptarë, do të jetë në gjendje të luftojë këtë kancer. Pikërisht mes bashkëpunimit perfekt, do ta arrijmë këtë objektiv”. /tesheshi.com/
