Napoli dhe Interi u takuan sonte në “San Paolo” në ndeshjen hapëse të javës së 15-të të Serisë A. Vendasit kishin zhgënjyer të hënën ndaj Sasuolos, ndaj së cilës arritën vetëm një barazim. Ndryshe tyre, miqtë në të njëjtën ditë kishin fituar ndaj Fiorentinës; e para fitore për trajnerin Pioli në krye të Interit.
Pamje krejt tjetër sonte: Napoli luan shkëlqyeshëm, Interi nuk duket askund.
Napolitanët ua prenë hovin e fillimjavës interistëve me një gol që në minutën e dytë, me realizues Zielinski-n. Pa marrë frymë mirë, në të pestën minutë shënon Hamsik. Stadiumi është në festë, lojtarët e Interit nuk e kuptojnë se çfarë po ngjet.
Loja vazhdoi të kontrollohej për gjatë gjithë kohës nga të zotët e shtëpisë; Elseid Hysaj qe aktiv në shumë momente të saj.
Goli i Insigne-s në minutën e 51-të vulosi rezultatin 3-0, ndërsa për asnjë çast Interi nuk u duk se mund ta kthente ndeshjen në favorin e vet.
Napoli luan të martën në Portugali ndaj Benfikës, një ndeshje vendimtare për kualifikimin në fazën tjetër të Champions League-s, çka e bën fitoren e sotme mjaft të rëndësishme për kthimin e vetëbesimit në skuadër.
Në vend të gjashtë, Napoli ka 28 pikë, po aq sa Lacio dhe Atalanta. Diferenca me Romën e Milanin e vendit të dytë dhe të tretë është vetëm një pikë.
Interi, ndërkohë, renditet i teti, me 21 pikë, por mund të rrëshqasë më poshtë pasi t’i luajnë dhe ekipet e tjera takimet e kësaj jave. /tesheshi.com/
