Në një intervistë të gjatë në Opinion, ish-kryeministri dhe ish-kryesocialisti Fatos Nano shpalosi hapur mbështetjen e tij për pasardhësin në PS, kryeministrin aktual Edi Rama, e njëherësh duke u pozicionuar kundër ish-rivalit të tij të hershëm Meta. Për këtë të fundit, tha se ka 7 mëkatet e Biblës.
Ndërsa për Ramën, pasi shpjegoi psenë e ftesës në qeverisje, tha se ai tashmë ishte maturuar në krye të qeverisjes
“Kisha arritur të flas me Edin, gjatë dy viteve të mia në Paris kur takova Zhospenin, mars- prill 1998. U takuam natyrshëm.
Aty e ftova. Kemi harxhuar një natë të gjatë duke bredhur rrugëve të Parisit, sa u mbyllën lokalet. Dhe ai ishte i shoqëruar me gjermankën atëherë, partneren e tij dhe ajo i thoshte: Dëgjoje ka të drejtë. Unë e fotja ai hezitonte. Arsyeja ishte njerëzore. Unë kisha nevojë për një rebel në rrethin e socialistëve. Një njeri me ide novatore që të provokonte mendimin e ndenjur që trashëgova. Dhe isha i sinqertë në këtë ftesë”, tha Nano, duke vijuar:
“Edi Rama është maturuar dukshëm në zyrën e kryeministrit dhe në detyrën e kryeministrit, sepse detyra e kryeministrit është e tillë, që kur e bën me seriozitet të maturon. Të bën të ndjesh deri në pore përgjegjësinë e vendimarrjes në dobi të shumicës së njerëzve”, theksoi ish-lideri historik i socialistëve.
Për Metën, ai tha se nuk ka asnjë lloj kontakti me të, as fizik e as komunikativ.
“Dhe nuk më mungon”, shtoi me ironi.
Ndërsa Berishës i faturoi kulturën e ulët politike.
“Njeriu që ka ngulur konfliktin që edhe sot e kësaj dite nuk po largohet dot në politikën shqiptare, është Sali Berisha. Dhe di vetëm mënyra konfliktuale për të realizuar ambiciet e veta. Është e pamundur të kesh një proces paqësor të shtrirë në kohë për të arritur synime të mëdha me kostot më të ulëta me Sali Berishën.
Berisha ka qenë dhe është rritur si politikan i konfliktit. Nëse nuk do të ishte Berisha në krye të opozitës, kjo është bindja imë e patundur e mbështetur në 30 vite politikë, Shqipëria do kishte ecur shumë më shpejt, me shumë më pak kosto dhe me tranzicione normale më të shpeshta”, tha Fatos Nano. /tesheshi.com/
