Japonezi 29-vjeçar e ka zgjatur dhe me tre vite qëndrimin e tij te skuadra italiane e Interit. Sipas kontratës së re, ai do të luajë në radhët e Interit gjer në 30 qershor të 2019-ës.
Nagatomo iu bashkua Interit në vitin 2011, e deklaron se kurrë nuk e ka menduar largimin nga ekipi i Milanos. Ai pretendon se në janar ka refuzuar një mundësi për të kaluar te Mançester Junajtedi.
“Kurrë nuk e kam menduar të largohem. E dua Interin dhe dua të jap gjithçka për objektivin tonë. Jam këtu prej pesë vitesh, e jam i lumtur. Çdokush më trajton mirë,” ka thënë ai për faqen elektronike të klubit.
“Ndjehem në shtëpi. Dua të falënderoj presidentin, klubin, Havier Zanetin, Roberto Mançinin, stafin dhe tifozët.”
Mbrojtësi nga kontinenti aziatik ka bërë mbi 170 paraqitje me Interin. Në këtë sezon ai ka luajtur në 21 takime, 17 prej të cilëve ka qenë në kampionat, e katër në Kupën e Italisë. /tesheshi.com/
