Shkodran Mustafi po bëhet gati të nisë një aventurë të re, këtë herë te Arsenali, në Premier League. Për këtë transferim është folur prej ditësh, por tani duket se gjithçka është drejt finalizimit.
Qendërmbrojtësi i Valencias ka arritur marrëveshjen me topçinjtë e Londrës, kurse pritet vetëm që diçka e tillë të arrihet dhe midis klubeve.
“Shkodrani dhe Arsenali kanë arritur një marrëveshje; klubet duhet të bien dakort tani për çmimin,” ka pohuar agjenti i lojtarit, Ali Bullut.
Arsenali kërkon me ngulm që transferimi të jetë mbyllur para mesditës të së premtes, në mënyrë që Mustafi të ketë mundësi të jetë në fushë të dielën, në përballjen ndaj Liverpulit.
Pas Granit Xhakës, Mustafi do të bëhet lojtari i dytë me origjinë shqiptare që do të aktivizohet te skuadra londineze. Xhaka qe një objektiv i hershëm i Arsenalit, dhe blerja e tij ishte ndër të parat e transferimeve të verës. /tesheshi.com/
