Mustafa takon Mogherini-n në Nju Jork: BE të nënshkruajë sa më shpejt MSA-në me Kosovën

Kryeministri i Kosovës, Isa Mustafa kërkoi nënshkrimin e shpejtë të marrëveshjes së Stabilizim-Asociimit me BE-në, gjatë një takimi që pati në Nju Jork me shefen e lartë për Politikë të Jashtme të bllokut, Federica Mogherini.
Gjatë këtij takimi, kryeministri Mustafa e informoi Mogherinin për progresin e gjithanshëm që po arrihet në Kosovë dhe përkushtimin e qeverisë për avancimin e mëtejshëm të reformave, si dhe veçoi angazhimin për proceset integruese evropiane, duke kërkuar finalizimin e MSA-së dhe liberalizimin e vizave për qytetarët e Kosovës.
“Kërkuam që të kemi gatishmërinë e Bashkimit Evropian që të nënshkruhet sa më shpejt marrëveshja e Stabilizim-Asocimit dhe po ashtu të hapet mundësia e liberalizimit të vizave. Ne do t’i përmbushim edhe 5-6 çështje që kanë mbetur dhe kemi bindjen se të gjitha kushtet teknike i përmbushim dhe se mbetet vetëm marrja e vendimit politik”, theksoi kryeministri Mustafa, duke shprehur bindjen se përgjigja pozitive nga Bashkimi Evropian për këto dy çështje, nuk do të vonohet.
Përfaqësuesja e lartë e BE-së, Federica Mogherini, vlerësoi progresin që po arrihet në Kosovë, duke shprehur përkrahje për rrugën integruese evropiane të Kosovës. /tesheshi.com/