Mustafa reagon për arrestimin dhe lirimin e Kurtit: opozita të respektojë ligjet dhe Kushtetutën

Pas ngjarjeve të një nate më parë, kur u arrestua e u lirua Albin Kurti e kur mbështetës të tij kanë reaguar me protesta, vjen qëndrimi i kryeministrit Isa Mustafa. Ai thotë se ndjen keqardhje për zhvillimet në Prishtinë, duke theksuar se “lajmet dhe pamjet e tilla, na bëjnë të ndjehemi keq”.
“Si kryeministër i Kosovës, jam i vendosur të respektoj plotësisht ndarjen e pushteteve. Nuk më takon mua dhe asnjë politikani tjetër të ndërhyjë në punën e autoriteteve të rendit dhe atyre të drejtësisë. Përpara ligjit, të gjithë jemi qytetarë të barabartë. Kështu kemi vendosur kur kemi votuar ligjet dhe Kushtetutën e vendit tonë,” ka theksuar Mustafa.
Për shefin e qeverisë, dhuna është e papranueshme si mjet politik.
Më tej ai u shpreh i bindur se organet e rendit dhe të drejtësisë kanë vepruar në përputhje me ligjet, Kushtetutën dhe me maturinë që kërkon situata në të cilën ndodhet vendi.

“Në të njëjtën mënyrë, dua të besoj që kështu duhet të reagojnë edhe ata që nuk pajtohen me vendimet e organeve të rendit dhe të drejtësisë. Sidomos këto ditë, kur kemi përpara vetes nënshkrimin e marrëveshjes së Stabilizim-Asociimit me Bashkimin Evropian dhe përmbylljen e kritereve për liberalizimin e vizave, na duhet sjellje e përgjegjshme dhe në përputhje me normat ligjore, në interes të stabilitetit, ka shkruar Mustafa në profilin e tij në Facebook./tesheshi.com/